سندھ ہائیکورٹ نے حکم امتناع واپس لے کر ’کےفور‘ منصوبے پر کام کی اجازت دے دی
سندھ ہائی کورٹ نے کراچی کو فراہمی آب کے منصوبے ’کے فور‘ کے راستے میں آنے والی زمین سے متعلق مولا بخش اور دیگر کی اپیلیں خارج کرتے ہوئے حکم امتناع واپس لے کر کے فور منصوبے کے لیے کام کی اجازت دے دی۔
ڈان نیوز کے مطابق سندھ ہائی کورٹ نے کراچی کو فراہمی آب کے منصوبے کے فور کے راستے میں آنیوالی زمین سے متعلق حکم امتناع واپس لے لیا۔
دوران سماعت بیرسٹر ولید خانزادہ نے موقف اپنایا کہ حکم امتناع کی وجہ سے کراچی کو پانی کی فراہمی کا منصوبہ تاخیر کا شکار ہے۔
درخواست گزار کی وکیل فریدہ منگریو ایڈووکیٹ نے موقف اپنایا کہ حکومت نے جو زمین لینی ہے اس کے لیے تمام قوانین پر عملدرآمد کیا جائے، دیہہ اللہ پیمائی تعلقہ شاہ مرید میں 4 ایکڑ زمین کا تنازع ہے، اس زمین کے حکم امتناع کی وجہ سے پروجیکٹ میں تاخیر کا بہانہ جھوٹا ہے، کے فور پروجیکٹ کے متعلق حکومتی پالیسیاں واضح نہیں ہیں۔
فریدہ منگریو ایڈووکیٹ نے کہا کہ منصوبے کے لیے پہلے فنڈز نہیں تھے پھر واپڈا کے حوالے کردیا گیا، 2014 میں ایک نوٹی فکیشن جاری ہوتا ہے اور 2017 میں اس کی تصحیح کی جاتی ہے۔
جسٹس اقبال کلہوڑو نے ریمارکس دیے کہ اگر حکم امتناع کے باوجود کام جاری ہے تو توہین عدالت کی درخواست دائر کریں، تھوڑی سی زمین کے لیے عوامی اہمیت کے حامل منصوبے کو نہیں روکا جاسکتا۔
عدالت نے مولا بخش سمیت دیگر کی اپیلیں خارج کرتے ہوئے کے فور منصوبے کے لیے کام کی اجازت دے دی۔
لائیو ٹی وی