وزیراعلیٰ پنجاب نے دیگر صوبوں کے طلبہ کیلئے بھی ہونہار اسکالر شپ اسکیم کی منظوری دیدی
وزیراعلیٰ پنجاب مریم نواز نے دیگر صوبوں کے طلبہ کے لیے بھی ہونہار سکالر شپ سکیم کی منظوری دے دی۔
ڈان نیوز کے مطابق وزیراعلیٰ پنجاب مریم نواز کی زیر صدارت خصوصی اجلاس ہوا جس میں ہائر ایجوکیشن سے متعلق اہم فیصلے ہوئے۔
وزیراعلیٰ پنجاب مریم نواز نے پنجاب میں سیکنڈ ایئر، تھرڈ ایئر اور فور تھ ا یئر کے لیے ہونہار اسکالرشپ کی باضابطہ منظوری دے دی جبکہ پنجاب میں طلبہ کے لیے لیپ ٹاپس کی تعداد بڑھا کر ایک لاکھ10 ہزارکر دی۔
پنجاب میں لیپ ٹاپ حاصل کرنے کے لیے کم از کم 65 فیصد اہلیت مقرر کی گئی ہے، دیگر صوبوں کے طلبہ کے لیے بھی پنجاب کی طرح اہلیت کا یکساں معیار مقرر کیا گیا ہے، وزیراعلیٰ پنجاب نے ہونہار اسکالرشپ اور لیپ ٹاپ اسکیم کے طلبہ کے لیے خصوصی ہیلپ لائن قائم کرنے کی ہدایت کردی۔
اجلاس کے دوران گفتگو کرتے ہوئے وزیراعلیٰ پنجاب مریم نوا زکا کہنا تھا کہ ہونہار اسکالرشپ اور لیپ ٹاپ ہر بچے کا حق اور حکومت کی ذمہ داری ہے، تعلیم اور یوتھ قوم کی حقیقی انویسٹمنٹ ہے، دل چاہتا ہے ہر بچے کو لیپ ٹاپ ملے، لیپ ٹاپ اور ہونہار اسکالرشپ دیگر صوبوں کے طلبہ کا بھی حق ہے۔
مریم نواز نے کہا کہ آزاد کشمیر، گلگت بلتستان، بلوچستان اور خیبرپختونخوا سمیت دیگر صوبوں کے طلبہ بھی ہمارے بچے ہیں، میرٹ پر آنے والا ہر بچہ اچھے کالج میں اپلائی کرے فیس ہم دیں گے۔
انہوں نے کہا کہ ماں کی طرح سوچتی ہوں، ہربچے کی قسمت بدلنا چاہتے ہیں، ہونہار اسکالرشپ کے لیے جو پنجاب کا معیار ہے وہی دیگر صوبوں کے طلبہ کے لیے مقرر کیا جائے گا، وزیراعلیٰ پنجاب نے مزید کہا کہ طلبہ کے لیے کسی بھی سکیم میں فنڈز کی فراہمی رکاوٹ نہیں بننے دی جائے گی۔
لائیو ٹی وی