آرمی چیف سے مالدیپ کے چیف آف ڈیفنس فورسز کی ملاقات، باہمی دلچسپی کے امور پر تبادلہ خیال
آرمی چیف جنرل سید عاصم منیر سے مالدیپ کے چیف آف ڈیفنس فورسز میجر جنرل ابراہیم حلمی کی ملاقات ہوئی، جس میں دوطرفہ دفاعی تعاون اور باہمی دلچسپی کے امور پر تبادلہ خیال کیا گیا۔
پاک فوج کے شعبہ تعلقات عامہ (آئی ایس پی آر) نے بتایا کہ مالدیپ کی مسلح افواج کے چیف آف ڈیفنس فورسز (سی ڈی ایف) میجر جنرل ابراہیم حلمی نے جنرل ہیڈ کوارٹرز راولپنڈی میں چیف آف آرمی اسٹاف جنرل سید عاصم منیر سے ملاقات کی۔
آئی ایس پی آر کے مطابق ملاقات کے دوران دوطرفہ دفاعی تعاون اور علاقائی سلامتی سمیت باہمی دلچسپی کے امور پر تفصیلی تبادلہ خیال کیا گیا۔
پاک فوج کے شعبہ تعلقات عامہ کا مزید کہنا تھا کہ دونوں اطراف نے پاکستان اور مالدیپ کے درمیان بھائی چارے اور پائیدار دوستی پر اظہار اطمینان کیا اور اہم علاقائی امور پر مشترکہ نقطہ نظر پر زور دیا۔
آئی ایس پی آر کے مطابق دونوں فوجی رہنماؤں نے باہمی دلچسپی کے شعبوں میں تعاون بڑھانے کے مقصد سے دوطرفہ تعلقات مضبوط بنانے اور ان کی بحالی کے اپنے عزم کا اعادہ کیا۔
آئی ایس پی آر کا مزید کہنا تھا کہ معزز مہمان نے پاک فوج کی غیر معمولی پیشہ ورانہ مہارت، لگن اور علاقائی استحکام کے لیے کردار کو سراہا۔
لائیو ٹی وی