سونے کی قیمتوں میں ریکارڈ تیزی جاری، فی تولہ نرخ نئی بُلند ترین سطح پر
ملک بھر میں سونے کی قیمتوں میں ریکارڈ تیزی کا سلسلہ جاری ہے، آج بھی فی تولہ نرخ 2 ہزار 500 روپے بڑھ کر 3 لاکھ 4 ہزار روپے کی نئی بُلند ترین سطح پر پہنچ گئے۔
سرکاری خبر رساں ادارے ’اے پی پی‘ کے مطابق آل پاکستان صرافہ جیمز اینڈ جیولرز ایسوسی ایشن نے رپورٹ کیا کہ 24 قیراط کے حامل فی تولہ خالص سونے کا بھاؤ 2 ہزار 500 روپے اضافے سے 3 لاکھ 4 ہزار روپے کا ہو گیا۔
اسی طرح 24 قیراط 10 گرام سونے کے دام 2 ہزار 144 روپے بڑھ کر 2 لاکھ 60 ہزار 631 روپے تک جا پہنچے جبکہ 22 قیراط 10 گرام سونا ایک ہزار 965 روپے بڑھ کر 2 لاکھ 38 ہزار 920 روپے میں فروخت ہوا۔
ادھر، فی تولہ اور 10 گرام چاندی کی قیمت بھی بالترتیب 55 روپے اور 47 روپے اضافے کے بعد 3 ہزار 367 روپے اور 2 ہزار 886 روپے تک پہنچ گئی۔
ایسوسی ایشن نے رپورٹ کیا کہ عالمی منڈی میں فی اونس سونے کی قیمت 25 ڈالر بڑھ کر 2 ہزار 888 ڈالر ریکارڈ کی گئی ہے۔
واضح رہے کہ گزشتہ روز بُلندترین سطح پر پہنچنے کے بعد سونے کی قیمت میں یکدم ایک ہزار 600 روپے کی کم ہو گئی تھی، جس کے بعد 24 قیراط کے حامل خالص سونے کی قیمت ایک ہزار 600 روپے تنزلی سے 3 لاکھ ایک ہزار 500 روپے پر آ گئی تھی۔
اس سے قبل 10 فروری کو فی تولہ سونا 4 ہزار روپے کے بڑے اضافے سے نئی بُلند ترین سطح 3 لاکھ 3 ہزار روپے تک جا پہنچا تھا۔
اسی طرح 24 قیراط 10 گرام سونا 3 ہزار 429 روپے بڑھ کر 2 لاکھ 59 ہزار 773 روپے میں فروخت ہوا تھا، جبکہ 22 قیراط 10 گرام سونے کا بھاؤ 2 لاکھ 38 ہزار 133 روپے تک پہنچ گیا تھا۔
لائیو ٹی وی