پاکستان سے فلسطین، لبنان اور شام کے متاثرین کی امداد کا سلسلہ جاری
پاکستان کی جانب سے فلسطین، لبنان اور شام کے جنگ سے متاثرہ افراد کو انسانی امداد کی فراہمی جاری رکھے ہوئے ہے، جب کہ امدادی سامان لے کر ایک اور طیارہ ہفتے کے روز مصر کے لیے روانہ ہوگیا۔
ڈان اخبار میں شائع خبر کے مطابق نیشنل ڈیزاسٹر مینجمنٹ اتھارٹی (این ڈی ایم اے) کی جانب سے 24 ویں امدادی کھیپ ایک چارٹرڈ پرواز کے ذریعے کراچی کے جناح انٹرنیشنل ایئرپورٹ سے مصر کے العریش انٹرنیشنل ایئرپورٹ روانہ کی گئی۔
این ڈی ایم اے کی پریس ریلیز کے مطابق یہ کھیپ 60 ٹن امدادی سامان پر مشتمل ہے، جس میں خیمے، موسم سرما کے خیمے اور ترپال بھی شامل ہیں، جو الخدمت فاؤنڈیشن کے تعاون سے جنگ سے متاثرہ افراد کے لیے روانہ کی گئی ہیں۔
واضح رہے کہ الخدمت فاؤنڈیشن نے اکتوبر 2023 میں غزہ پر اسرائیلی بمباری کے فوری بعد متاثرین کی مشکلات کو کم کرنے کی کوشش میں مصر کے العریش ہوائی اڈے پر غزہ کے لوگوں کے لیے امدادی سامان روانہ کرتے ہوئے سرگرمیاں بڑھائی تھیں۔
نومبر 2023 میں فلاحی تنظیم کی طرف سے پریس ریلیز میں کہا گیا تھا کہ نیشنل ڈیزاسٹر مینجمنٹ اتھارٹی کے ساتھ مل کر فاؤنڈیشن نے جامع امدادی پیکج بھیجا ہے، جس میں ضروری اشیا بشمول خوراک، ادویات، حفظان صحت کی کٹس، ڈیلیوری کٹس اور بچوں کی کٹس شامل ہیں۔
بیان میں مزید کہا گیا تھا کہ فاؤنڈیشن 5 اضافی طیارے بھیجنے کے لیے تیار ہے، جس میں ضروری اشیا پہلے سے ہی شپنگ پوزیشن میں ہیں۔
لائیو ٹی وی