کراچی میں مصطفیٰ عامر قتل کیس کی تفتیش کے دوران گرفتار کیے گئے منشیات فروشی کے اہم کردار و معروف اداکار کے بیٹے ساحر حسن کی تفتیشی رپورٹ سامنے آگئی، عدالت نے ملزم کے جسمانی ریمانڈ میں مزید توسیع کر دی۔

ڈان نیوز کے مطابق تفتیشی رپورٹ میں گرفتار ملزم نے ہوشربا انکشافات کر دیے، ملزم نے بتایا کہ اس نے بیچلر آف بزنس ایڈمنسٹریشن تک پڑھائی کر رکھی ہے، 5 سال سے ماڈلنگ کر رہا تھا، 13 سال سے ’ویڈ‘ کا نشہ کر رہا ہے اور 2 سال قبل ویڈ فروخت کرنا شروع کر دی تھی۔

ملزم نے تفتیشی حکام کو بتایا کہ منشیات کا مکمل بزنس اسنیپ چیٹ پر چلاتا تھا، 2 ماہ قبل ہی شادی ہوئی ہے، وہ بازل اور یحییٰ سے منشیات لے کر فروخت کرتا ہے، پاکستان کی دو بڑی کوریئر کمپنیوں کے ذریعے کروڑوں کی منشیات منگوائی، ملزم نے انکشاف کیا کہ ہر ہفتے 4 سے 5 لاکھ کی رقم ادا کرتا ہوں، مہینے میں دو مرتبہ ایک کلو سے زائد ویڈ منگواتا ہوں۔

ملزم ساحر نے بتایا کہ ایک گرام ویڈ 10 ہزار روپے میں فروخت کرتا تھا، ڈیجیٹل اسکیل پر ویڈ کا وزن کرتا ہوں، ملزم ساحر حسن نے 12 سے زائد کلائنٹس کے نام بھی پولیس کو بتا دیے۔

ملزم ساحر حسن کے جسمانی ریمانڈ میں توسیع

کراچی میں جوڈیشل کمپلیکس سینٹرل جیل میں قائم عدالت نے معروف اداکار کے بیٹے ساحر حسن سے منشیات برآمدگی کے مقدمے میں ملزم ساحر حسن کے جسمانی ریمانڈ میں ایک دن کی توسیع کر دی۔

اسپیشل انویسٹی گیشن یونٹ (ایس آئی یو) نے جسمانی ریمانڈ مکمل ہونے پر ملزم کو عدالت میں پیش کیا، تفتیشی افسر نے مؤقف اختیار کیا کہ ملزم سے تفتیش کے لیے مزید ریمانڈ درکار ہے۔

عدالت نے ملزم ساحر حسن کے جسمانی ریمانڈ میں ایک روز کی توسیع کردی۔ ملزم کو کل دوبارہ عدالت میں پیش کیا جائے گا۔

واضح رہے کہ 22 فروری 2025 کو کراچی کے علاقے ڈیفنس ہاؤسنگ اتھارٹی سے معروف ادکار کے بیٹے اور نوجوان اداکار کو گرفتار کر لیا گیا تھا، جب کہ اس کے قبضے سے منشیات برآمد کرنے کا دعویٰ بھی کیا تھا۔

ڈپٹی انسپکٹر جنرل (ڈی آئی جی) سی آئی اے مقدس حیدر نے بتایا تھا کہ نوجوان مصطفیٰ عامر کے حالیہ قتل کے بعد ڈی ایچ اے میں کریک ڈاؤن جاری ہے، جب کہ ایک نوجوان اداکار کو گرفتار کیا ہے اور اس کی تحویل سے منشیات برآمد ہوئی ہے۔

ڈی آئی جی مقدس حیدر نے وضاحت کی تھی کہ ساحر حسن کو مصطفیٰ عامر قتل کیس کے سلسلے میں گرفتار نہیں کیا گیا، بلکہ اس کیس کے بعد منشیات کے خلاف مہم کے دوران حراست میں لیا گیا ہے۔

انہوں نے کہا کہ ایسے عناصر کے خلاف کریک ڈاؤن شروع کیا جو پوش علاقوں میں پارٹیوں اور تعلیمی اداروں کے طلبہ کو منشیات فراہم کرنے میں ملوث ہیں۔

مقدس حیدر کا کہنا تھا کہ گرفتار ملزم کے خلاف ایف آئی آر درج کی جا رہی ہے۔