سرفراز احمد کوئٹہ گلیڈی کے ٹیم ڈائریکٹر مقرر
پاکستان سپر لیگ (پی ایس ایل) کی فرنچائز کوئٹہ گلیڈی نے سرفراز احمد کو ٹیم کا ڈائریکٹر مقرر کر دیا۔
ڈان نیوز کے مطابق کوئٹہ گلیڈی ایٹرز کے مالک ندیم عمر نے سرفراز احمد کو ڈائریکٹر بنانے کا اعلان کیا۔
ندیم عمر کا کہنا تھا کہ امید ہے کہ سرفراز ڈائریکٹر کی حیثیت سے بھی بہترین خدمات انجام دیں گے، سرفراز احمد اس سے پہلے بحیثیت کپتان کوئٹہ گلیڈی ایٹرز کے لیے کھیلتے رہے، سرفراز کی قیادت میں کوئٹہ گلیڈی ایٹرز نے 2019 میں پی ایس ایل کا ٹائٹل اپنے نام کیا تھا۔
یاد رہے کہ 25 جنوری 2025 کو پاکستان کرکٹ ٹیم کے سابق کپتان سرفراز احمد کا پاکستان سپر لیگ (پی ایس ایل) کی فرنچائز کوئٹہ گلیڈی ایٹرز کے ساتھ 9 سالہ طویل سفر ختم ہوگیا تھا۔
سماجی رابطے کی ویب سائٗٹ انسٹا گرام پر جاری اپنی ایک پوسٹ میں سرفراز احمد نے کوئٹہ گلیڈی ایٹرز کے ساتھ اپنے سفر کے اختتام کا اعلان کیا تھا۔
اس موقع پر فرنچائز کے مالک ندیم عمر کا شکریہ ادا کرتے ہوئے سرفراز احمد نے کہا تھا کہ میں آج آپ کو یہ بتانا چاہتا ہوں کہ کوئٹہ گلیڈی ایٹرز کے ساتھ میرا وقت ختم ہوگیا۔
یاد رہے کہ کوئٹہ گلیڈی ایٹرز نے گزشتہ ایڈیشنز میں فرنچائز کی مسلسل شسکستوں کے پیش نظر پاکستان سپر لیگ کے 9ویں سیزن کے لیے سرفراز احمد کی جگہ رائلی روسو کو کپتان مقرر کردیا تھا۔
سرفراز احمد نے لیگ کے ابتدائی آٹھوں ایڈیشنز میں کوئٹہ گلیڈی ایٹرز کی قیادت کی تھی لیکن گزشتہ چند سیزنز کے دوران ٹیم کی مسلسل ابتر پرفارمنس کے بعد سرفراز احمد کو قیادت سے ہٹانے کا فیصلہ کیا گیا تھا۔
لیگ کے ابتدائی 4 سیزنز میں گلیڈی ایٹرز نے عمدہ کھیل پیش کیا تھا لیکن اس کے بعد قسمت کی دیوی ان سے روٹھ گئی تھی۔
لیگ کے ابتدائی دونوں ایڈیشنز میں گلیڈی ایٹرز کی ٹیم رنر اپ رہی تھی اور 2018 کے ایڈیشن میں ٹیم پلے آف میں ناکامی کے بعد چوتھے نمبر پر رہی تھی۔
تاہم 2019 میں سرفراز احمد کی زیر قیادت گلیڈی ایٹرز کی ٹیم نے پہلی مرتبہ چیمپیئن بننے کا اعزاز حاصل کیا تھا لیکن شین واٹسن اور رائلی روسو جیسے کھلاڑیوں کے ٹیم سے جانے کے بعد ٹیم کی کارکردگی روبہ زوال ہو گئی۔
ٹیم کی خراب کارکردگی کا اندازہ اس بات سے لگایا جا سکتا ہے کہ پچھلے چاروں ایڈیشنز میں ٹیم پلے آف مرحلے کے لیے بھی کوالیفائی نہیں کر سکی۔
لائیو ٹی وی