آئینی بینچ: عمران خان کیخلاف توہین عدالت کیس کی سماعت غیر معینہ مدت تک ملتوی
سپریم کورٹ نے پاکستان تحریک انصاف ( پی ٹی آئی) کے بانی عمران خان کے خلاف لانگ مارچ توہین عدالت کیس کی سماعت غیر معینہ مدت تک کے لیےملتوی کردی، عدالت نے ایڈیشنل اٹارنی جنرل عامر رحمان کے پیش ہونے پر سوال بھی اٹھایا۔
ڈان نیوز کے مطابق سپریم کورٹ کے جسٹس امین الدین خان کی سربراہی میں 5 رکنی آئینی بینچ نے عمران خان کے خلاف حکومت کی توہین عدالت کی درخواست پر سماعت کی، دوران سماعت عدالت نے ایڈیشنل اٹارنی جنرل عامر رحمان کی جانب سے پیش ہونے پر سوال اٹھا دیا۔
جسٹس جمال خان مندو خیل نے ریمارکس دیے کہ اگر توہین عدالت کی کارروائی شروع ہو تو اٹارنی جنرل آفس پراسیکیوٹر ہوتا ہے، ایڈیشنل اٹارنی جنرل نے موقف اختیار کیا اس مقدمہ میں سینئر وکیل سلمان اسلم بٹ کی خدمات حاصل کی گئی ہیں، سلمان اسلم بٹ آج دستیاب نہیں ہیں۔
جسٹس جمال مندو خیل نے ریمارکس دیے کہ توہین عدالت کے کیس میں درخواست گزار کا کام صرف معلومات دینا ہوتا ہے، معلومات عدالت تک پہنچ گئی ہیں اب حکومت کا کام ختم ہوگیا۔
عدالت نے سلمان اسلم بٹ کی عدم پیشی پر سماعت غیرمعینہ مدت تک ملتوی کر دی، واضح رہے کہ حکومت نے جون 2022 میں لانگ مارچ کو مقررہ مقام سے 4 کلومیٹر آگے جناح ایونیو تک لانے پر عمران خان کے خلاف توہین عدالت کی درخواست دائر کی تھی۔
لائیو ٹی وی