بلوچستان کے ضلع قلات میں سیکیورٹی فورسز نے دہشت گردوں کی موجودگی کی اطلاع پر انٹیلی جنس کی بنیاد پر آپریشن کے دوران 6 دہشت گردوں کو ہلاک کردیا۔

پاک فوج کے شعبہ تعلقات عامہ (آئی ایس پی آر) کی جانب سے جاری بیان میں کہا گیا کہ سکیورٹی فورسز نے ضلع قلات میں دہشت گردوں کی موجودگی کی اطلاع پر کارروائی کی۔

ترجمان پاک فوج کا کہنا تھا کہ آپریشن کے دوران پاک فوج کے جوانوں نے دہشت گردوں کے ٹھکانوں کو موثر انداز میں نشانہ بنایا اور شدید فائرنگ کے تبادلے کے بعد 6 دہشت گردوں کو جہنم واصل کردیا۔

آئی ایس پی آر کے مطابق ہلاک ہونے والے دہشت گرد علاقے میں قانون نافذ کرنے والے اداروں کے علاوہ معصوم شہریوں کے خلاف حالیہ دہشت گردی کی سرگرمیوں میں ملوث تھے۔

ترجمان پاک فوج نے بیان میں کہا کہ علاقے میں پائے جانے والے دیگر دہشت گرد کے خاتمے کے لیے سینیٹائزیشن آپریشن جاری ہے۔

آئی ایس پی آر کا مزید کہنا تھا کہ پاکستان کی سیکیورٹی فورسز بلوچستان کے امن، استحکام اور ترقی کو سبوتاژ کرنے کی کوششوں کو ناکام بنانے کے لیے پرعزم ہیں۔

صدر اور وزیراعظم کا سکیورٹی فورسز کو خراج تحسین

صدر پاکستان آصف علی زرداری نے ضلع قلات میں کارروائی کے دوران 6 دہشتگرد جہنم واصل کرنے پر سیکیورٹی فورسز کو خراج تحسین پیش کرتے ہوئے کہا کہ دہشت گرد عناصر کے خاتمے، ملکی دفاع کے لیے ہمارا عزم غیر متزلزل رہے گا۔

صدر مملکت کا کہنا تھا کہ دہشت گردوں کے مکمل خاتمے تک سیکیورٹی فورسز کی کارروائیاں جاری رہیں گی، انہوں نے دہشتگردی کے ناسور کے مکمل خاتمے کے قومی عزم کا بھی اظہارکیا۔

وزیراعظم ہاؤس سے جاری بیان کے مطابق وزیراعظم شہباز شریف نے قلات میں دہشت گردوں کے خلاف کامیاب کارروائی پر سیکیورٹی فورسز کے افسران و جوانوں کی پزیرائی کی۔

شہباز شریف نے سیکیورٹی فورسز کی پیشہ ورانہ مہارت کی تعریف کرتے ہوئے کہا کہ ملک سے دہشتگردی کے مکمل خاتمے تک جنگ جاری رہے گی، پوری قوم اپنے بہادر جوانوں کے شانہ بشانہ کھڑی ہے۔

وزیر اعلیٰ بلوچستان سرفراز بگٹی نے سیکورٹی فورسز کو خراج تحسین کرتے ہوئے کہا کہ دہشت گردوں کے خلاف بروقت کارروائی سے امن و استحکام کو تقویت ملی۔

ان کا کہنا تھا کہ بلوچستان کے دشمنوں کے خلاف جنگ جاری رہے گی، عوام اور سکیورٹی فورسز مل کر ملک دشمن عناصر کی سازش ناکام بنائیں گے۔