کراچی: عید کی خریداری کیلئے جانے والے موٹرسائیکل سوار میاں بیوی کار کی ٹکر سے جاں بحق
کراچی میں مائی کلاچی روڈ پر رات گئے تیز رفتار کار نے موٹرسائیکل کو ٹکر ماردی، حادثے کے نتیجے میں میں عید کی خریداری کےلیے جانے والے میاں اور بیوی جاں بحق اور بچی شدید زخمی ہوگئی۔
ڈان نیوز کے مطابق پولیس نے کار کے ڈرائیور حسام کو ہسپتال سے حراست میں لے کر تھانے منتقل کردیا، حادثے میں جاں بحق افراد کی شناخت 62 سالہ عبدالستار اور 50 سالہ آمنہ کے ناموں سے ہوئی۔
متوفین کی لاشوں کو ضابطے کی کارروائی کے بعد ورثا کے حوالے کردیا گیا جبکہ زخمی بچی کی حالت تشویشناک ہے اور اس کا اسپتال میں علاج جاری ہے۔
حادثے میں جاں بحق ہونے والے میاں بیوی بلدیہ ٹاؤن کے رہائشی تھے اور عید کی خریداری کے لیے جارہے تھے۔
یاد رہے کہ 26 مارچ کو شاہراہ فیصل پر سڑک کنارے موٹرسائیکل روک کر افطار کرنے والے میاں بیوی تیز رفتار گاڑی کی ٹکر سے جاں بحق ہوگئے تھے۔
پولیس نے بتایا تھا کہ جاں بحق میاں بیوی اللہ والا ٹاؤن کے رہائشی تھے اور ملازمت سے واپس آرہے تھے، خاتون اقصیٰ نارتھ کراچی کے اسکول میں ٹیچر تھی، جبکہ ایاز فیکٹری میں ملازمت کرتا تھا۔
اس سے قبل 24 مارچ کو کراچی میں ملیر ہالٹ بس اسٹاپ کے قریب واٹر ٹینکر نے موٹرسائیکل پر سوار میاں اور حاملہ بیوی کو کچل دیا تھا، حادثے کے دوران جنم لینے والا نومولود بھی دم توڑگیا تھا۔
لائیو ٹی وی