اسلام آباد ہائیکورٹ: ڈپٹی رجسٹرار کو آئندہ بغیر قانونی جواز کیس سنگل سے ڈویژن بینچ منتقل نہ کرنے کا حکم
اسلام آباد ہائی کورٹ نے ڈپٹی رجسٹرار جوڈیشل کو آئندہ بغیر قانونی جواز کیس سنگل سے ڈویژن بینچ ٹرانسفر کرنے سے روک دیا۔
ڈان نیوز کے مطابق جسٹس محسن اختر کیانی اور جسٹس سردار اعجاز اسحٰق نے 12 صفحات پر مشتمل فیصلہ جاری کردیا۔
2 رکنی بینچ نے اپنے تحریری فیصلے میں ڈپٹی رجسٹرار جوڈیشل کو کیس ٹرانسفر یا مارکنگ کرتے ہوئے عدالتی گائیڈ لائنز کو مدنظر رکھنے اور قائم مقام چیف جسٹس کی ہدایت پر ڈویژن بینچ میں مقرر کیسز کو دوبارہ متعلقہ بینچز میں بھیجنے کا حکم دیا ہے۔
حکام نامے میں کہا گیا ہے کہ جب تک فل کورٹ، ہائی کورٹ رولز پر مزید رائے نہ دے انہیں گائیڈ لائنز پر عمل کریں، عدالت نے ڈپٹی رجسٹرار جوڈیشل کو ہدایت کی ہے کہ ہائی کورٹ رولز اینڈ آرڈرز کے مطابق کیسز متعلقہ بینچ میں بھیج دیے جائیں۔
عدالت نے قرار دیا ہے کہ قانون کی تشریح ہو، ایک ہی طرح کےکیسز ہوں جو قانونی جواز دیں پھر ہی اختیار استعمال ہوسکتا ہے۔
عدالت نے اپنے فیصلے میں یہ گائیڈ لائن بھی دے دی ہے کہ کیسز مقرر کرنے یا مارک کرنے کا اختیار کس کا ہے۔
حکم نامے میں کہا گیا ہے کہ ہائی کورٹ رولز اینڈ آرڈرز کے مطابق سنگل یا ڈویژن بینچز میں کیسز مقرر کرنا ڈپٹی رجسٹرار جوڈیشل کا اختیار ہے، جبکہ رولز اینڈ آرڈرز کے مطابق روسٹر کی منظوری چیف جسٹس کا اختیار ہے۔
لائیو ٹی وی