شہباز شریف کی عمران خان کےخلاف ہرجانے کے دعوے پر ویڈیو لنک پر پیشی، بجلی بند ہوگئی
بانی پاکستان تحریک انصاف (پی ٹی آئی) عمران خان کے خلاف 10 ارب ہرجانہ کیس میں وزیر اعظم ویڈیو لنک پر جرح کے لیے عدالت میں پیش ہو گئے، اس دوران بجلی بند ہونے سے سماعت کچھ دیر کے لیے روک دی گئی۔
ڈان نیوز کے مطابق ایڈیشنل سیشن جج نے شہباز شریف کے ہتک عزت دعوے پر سماعت کی، وزیراعظم شہباز شریف بذریعہ ویڈیو لنک عدالت میں پیش ہوئے۔
بانی پی ٹی آئی کے وکیل محمد حسین نے وزیراعظم شہباز شریف پر جرح کی، جرح سے پہلے شہباز شریف نے کمرہ عدالت میں حلف لیا، بانی پی ٹی آئی کے وکیل نے وزیراعظم شہباز شریف سے سوال کیا کہ کیا آپ یہ تسلیم کرتے ہیں کہ آپ نے دعویٰ ڈسٹرکٹ کورٹ میں دائر نہیں کیا؟
شہباز شریف نے کہا یہ میرے پاس لکھا ہے کہ دعویٰ ڈسٹرکٹ جج کے پاس دائر ہوا۔
بانی پی ٹی آئی کے وکیل نے سوال کیا کہ آپ تسلیم کرتے ہیں کہ آپ نے دعوے میں کسی میڈیا ہاؤس کو فریق نہیں بنایا؟
وزیراعظم شہباز شریف نے کہا کہ جی، یہ بات درست ہے۔
بانی پی ٹی آئی کے وکیل نے سوال کیا کہ کیا یہ درست ہے کہ عمران خان نے آپ پر 10 ملین کا الزام آمنے سامنے نہیں لگایا، جس پر شہباز شریف نے کہا کہ ٹی وی پر سب کے سامنے بار بار یہ الزام لگایا گیا، یہ بیہودہ الزام بار بار دہرایا گیا۔
شہباز شریف پر جرح کے دوران بجلی بند ہو گئی، بجلی بند ہونے سے دعوے پر سماعت کچھ دیر کے لیے روک دی گئی۔
بعد ازاں عدالت نے شہباز شریف پر مزید جرح آئندہ سماعت تک ملتوی کرتے ہوئے سماعت 25 اپریل تک ملتوی کر دی۔
لائیو ٹی وی