پاکستان تحریک انصاف (پی ٹی آئی) کے بانی و سابق وزیر اعظم عمران خان نے اپنے اور سابق خاتون اول بشریٰ بی بی کے خلاف 190 ملین پاؤنڈ ریفرنس میں اپنے دفاع میں گواہ پیش کرنے کے بیان میں ترمیم کردی۔

ڈان نیوز کی رپورٹ کے مطابق اڈیالہ جیل راولپنڈی میں ریفرنس کی سماعت احتساب عدالت کے جج ناصر جاوید رانا نے کی، دوران سماعت ملزمان نے دستخط شدہ بیان داخل کروا دیے، بانی پی ٹی آئی نے اپنے دفاع میں گواہ پیش نہ کرنے سے متعلق عدالت کو آگاہ کیا۔

اس کے ساتھ ہی عدالت نے سماعت 17 دسمبر بروز منگل تک ملتوی کردی، آئندہ سماعت پر پراسیکیوشن کے وکلا حتمی بحث کا آغاز کریں گے۔

کیس کا پس منظر

واضح رہے کہ 190 ملین پاؤنڈز یا القادر ٹرسٹ کیس میں الزام لگایا گیا ہے کہ عمران خان اور ان کی اہلیہ نے پی ٹی آئی کے دور حکومت میں برطانیہ کی نیشنل کرائم ایجنسی (این سی اے) کی جانب سے حکومتِ پاکستان کو بھیجے گئے 50 ارب روپے کو قانونی حیثیت دینے کے عوض بحریہ ٹاؤن لمیٹڈ سے اربوں روپے اور سینکڑوں کنال مالیت کی اراضی حاصل کی۔

یہ کیس القادر یونیورسٹی کے لیے زمین کے مبینہ طور پر غیر قانونی حصول اور تعمیر سے متعلق ہے جس میں ملک ریاض اور ان کی فیملی کے خلاف منی لانڈرنگ کے کیس میں برطانیہ کی نیشنل کرائم ایجنسی (این سی اے) کے ذریعے 140 ملین پاؤنڈ کی وصولی میں غیر قانونی فائدہ حاصل کیا گیا۔

عمران خان پر یہ بھی الزام ہے کہ انہوں نے اس حوالے سے طے پانے والے معاہدے سے متعلق حقائق چھپا کر کابینہ کو گمراہ کیا، رقم (140 ملین پاؤنڈ) تصفیہ کے معاہدے کے تحت موصول ہوئی تھی اور اسے قومی خزانے میں جمع کیا جانا تھا لیکن اسے بحریہ ٹاؤن کراچی کے 450 ارب روپے کے واجبات کی وصولی میں ایڈجسٹ کیا گیا۔