ججز کوڈ آف کنڈکٹ، سپریم جوڈیشل کونسل انکوائری پروسیجر میں ترامیم کیلئے کمیٹی قائم
سپریم جوڈیشل کونسل نے ججز کوڈ آف کنڈکٹ اور سپریم جوڈیشل کونسل انکوائری پروسیجر میں ترامیم کے لیے جسٹس منیب اختر کی سربراہی میں کمیٹی تشکیل دے دی۔
سپریم کورٹ کی جانب سے جاری اعلامیے میں کہا گیا ہے کہ چیف جسٹس یحییٰ آفریدی کی زیر صدارت سپریم جوڈیشل کونسل کا اجلاس منعقد ہوا، جس میں جسٹس منصور علی شاہ، جسٹس منیب اختر، چیف جسٹس اسلام آباد ہائی کورٹ جسٹس عامر فاروق اور چیف جسٹس بلوچستان ہائی کورٹ جسٹس ہاشم کاکڑ نے شرکت کی۔
اعلامیے کے مطابق اجلاس کے دوران آرٹیکل 209 (8) کے تحت ججز کوڈ آف کنڈکٹ میں ترامیم زیر بحث لائی گئیں، سپریم جوڈیشل کونسل پروسیجر آف انکوائری 2005 میں ترامیم پر بات چیت ہوئی۔
اعلامیے میں کہا گیا ہے کہ کوڈ آف کنڈکٹ اور انکوائری پروسیجر میں ترامیم کی سفارش کے لیے جسٹس منیب اختر کی سربراہی میں کمیٹی تشکیل دے دی گئی ہے۔
اجلاس کے دوران آرٹیکل 209 کے تحت ججز کے خلاف 35 شکایات کا جائزہ لیا گیا، 30 شکایات کو نمٹا دیا گیا جبکہ 5 شکایات پر تبصرے طلب کیے گئے۔
واضح رہے کہ 8 نومبر کو سپریم جوڈیشل کونسل نے ججز کے خلاف دائر 10 شکایات ٹھوس ثبوت پیش نہ کیے جانے کی بنیاد پر خارج کر دی تھیں جبکہ اسلام آباد ہائی کورٹ کے 6 ججوں کے ایگزیکٹیو کی جانب سے عدلیہ کے معاملات میں مداخلت کے حوالے سے خط پر بھی تبادلہ خیال کیا گیا تھا۔
اعلامیے میں بتایا گیا تھا کہ کونسل نے آئین کے آرٹیکل 209 (8) کے تحت ججز کے ضابطہ اخلاق میں ترامیم اور اسلام آباد ہائی کورٹ کے 6 ججوں کے خط پر بھی تبادلہ خیال کیا تھا۔
اعلامیے میں کہا گیا تھا کہ کونسل نے اس سلسلے میں مختلف آپشنز اور طریقہ کار پر غور کیا اور اس موضوع پر مشاورت کو وسیع کرنے کا فیصلہ کیا کیونکہ یہ ضابطہ ججوں کے علاوہ مختلف اداروں کے سربراہان پر بھی لاگو ہوتا ہے اور اس معاملے کو ایک بار پھر آئندہ اجلاس میں اٹھانے کا فیصلہ کیا۔
لائیو ٹی وی