کراچی: چیئرمین مہاجر قومی موومنٹ آفاق احمد کو گرفتار کر لیا گیا
چیئرمین مہاجر قومی موومنٹ آفاق احمد کو حراست میں لے لیا گیا۔
انسپکٹر جنرل آف پولیس (آئی جی) غلام نبی میمن نے گرفتاری کی تصدیق کرتے ہوئے ڈان نیوز ڈاٹ ٹی وی کو بتایا کہ آج صبح شہر قائد میں ہیوی ٹرانسپورٹ نذر آتش کرنے اور لوگوں کو اکسانے کے الزام میں آفاق احمد کو گرفتار کیا گیا۔
ایک اور پولیس افسر نے نام ظاہر نہ کرنے کی شرط پر بتایا کہ لانڈھی میں چند افراد نے سامان لے جانے والی ہیوی ٹرانسپورٹ کو ’ہائی جیک‘ کیا تھا، جسے لانڈھی میں پارٹی کے دفتر لے جایا گیا اور صبح 7 بجے آگ لگا دی گئی۔
ترجمان مہاجر قومی موومنٹ کے مطابق آفاق احمد کو ان کی رہائش گاہ ڈیفنس سے گرفتار کیا گیا۔
ترجمان کا مزید کہنا تھا کہ 10 پولیس موبائلوں نے آفاق احمد کے بنگلے کا گھیراؤ کیا، جس پر چیئرمین مہاجر قومی موومنٹ نے پولیس کو کہا کہ میں چلنے کو تیار ہوں۔
یاد رہے کہ کراچی میں ہیوی ٹریفک روکنے کے لیے شہری آج بھی سڑکوں پر آئے جبکہ مختلف علاقوں میں 4 ٹرک جلا دیے گئے تھے، لانڈھی اور نارتھ کراچی میں شہریوں نے بھاری گاڑیوں کو شہر میں داخل ہونےسے روک دیا۔
اسی طرح سخی حسن پر مشتعل شہریوں نے واٹر باؤزر پر حملہ کیا، اس کے شیشے توڑے۔
ادھر، وزیر داخلہ سندھ ضیاالحسن لنجار نے ایڈیشنل آئی جی کراچی سے رپورٹ طلب کرلی۔
ڈان اخبار کی رپورٹ کے مطابق ایم کیو ایم پاکستان کی جانب سے جاری مشترکہ بیان میں دعویٰ کیا گیا تھا کہ اعداد و شمار کے مطابق صرف جنوری میں ٹریفک حادثات کے باعث 89 شہری جان سے ہاتھ دھو بیٹھے ہیں۔
واضح رہے کہ آج جنگ کی رپورٹ کے مطابق آفاق احمد نے کہا تھا کہ پانی ٹینکرز اور ہیوی ٹریفک کے حوالے سے انتظامیہ کی بار کی وضاحت گمراہ کن ہے۔
انہوں نے کہا تھا کہ الٹی میٹم آج ختم ہو گیا ہے، دن میں ہیوی ٹریفک سڑکوں پر نہ لائی جائے، آفاق احمد کے مطابق بات نوٹی فکیشن کی نہیں بلکہ اس پر عمل درآمد کی ہے۔
آفاق احمد کا کہنا تھا کہ دن کے اوقات میں ڈمپرز، ٹینکرز اور ہیوی ٹریفک پولیس کی سرپرستی میں لوگوں کی زندگیو ں کے چراغ گل کر رہا ہے، مزید کہا کہ انسانی زندگیوں سے کھیلنے کی اجازت نہیں دی جاسکتی۔
آفاق احمد نے کہا کہ 48گھنٹے کا الٹی میٹم منگل کی صبح ختم ہو رہا ہے، اس کے بعد کراچی کے نوجوان جانتے ہیں کہ انہیں اپنے لوگوں کی جان و مال کی حفاظت کیسے کرنا ہے۔
واضح رہے کہ کراچی کی سڑکوں پر ممنوع اوقات میں ہیوی ٹریفک کی آمد و رفت رک نہ سکی اور گزشتہ روز شہر میں دندناتے ڈمپر نے ایک اور جان لے لی تھی، ہاکس بے مشرف کالونی کے قریب ڈمپرکی ٹکر سے موٹرسائیکل سوار جاں بحق ہوگیا تھا۔
امیر جماعت اسلامی حافظ نعیم الرحمن نے الزام عائد کیا تھا کہ کراچی کے شہری ڈمپرز اور ٹینکرز کا نشانہ بن رہے ہیں، ڈیڑھ ماہ میں 100 سے زائد جانیں چلی گئیں۔
لائیو ٹی وی