قومی ٹیم کے نائب کپتان سلمان علی آغا نے کہا ہے کہ 320 رنز کا ہدف کے تعاقب میں پاور پلے میں رنز کی بہت اہمیت ہوتی ہے لیکن بدقسمتی سے وہ ہمیں اچھا نہیں مل سکا۔

کراچی میں کھیلے گئے چیمپئنز ٹرافی 2025 کے افتتاحی میچ کے بعد پریس کانفرنس کے دوران سلمان علی آغا کا کہنا تھا کہ ہم نے بیٹنگ، باؤلنگ اور فیلڈنگ کسی بھی شعبے میں اچھی کارکردگی نہیں دکھائی، جس کی ہم سے امید تھی یا جو ہمیں کرنی چاہیے تھی۔

انہوں نے کہا کہ ہمیں نہ صرف اپنا اسٹرائیک ریٹ بہتر کرنا ہوگا بلکہ اپنی اننگز کو مزید لمبا کرنا ہوگا، ہم 40 یا 50 رنز بنانے کے بعد لمبی اننگز نہیں کھیل پارہے، جس کی وجہ سے ہمیں شکست ہوتی ہے اور یہی وجہ ہے کہ ہم آج کا میچ بھی نہیں جیت سکے۔

ان کا کہنا تھا کہ اگر ہمیں دنیا کی دیگر ٹیموں کا مقابلہ کرنا ہے اور بہترین ٹیم بننا ہے تو ہمیں اپنی کارکردگی میں تسلسل لانا ہوگا تاہم آگے اس چیز کو بہتر کرنے کی کوشش کریں گے۔

نائب کپتان نے کہا کہ ہماری کوشش تھی کہ نیوزی لینڈ کو 250 سے 270 رنز یا زیادہ سے زیادہ 300 تک محدود کرسکیں لیکن ایک تو رنز زیادہ بن گئے اور پھر بیٹنگ میں بھی ہمارا آغاز اس طرح نہ ہوسکا۔

ان کا کہنا تھا کہ پوری اننگز میں مومنٹم نہیں بن سکا، جب 320 رنز کا ہدف حاصل کرنا ہوتا ہے تو اس میں ایک مومنٹم درکار ہوتا ہے وہ بن ہی نہیں پایا، وکٹیں گرتی گئیں اور ہم پاور پلے بھی جس طرح ہمیں کھیلنا چاہیے تھا وہ بھی نہیں کھیل پائے، شاید اس کی وجہ سے جیت نہیں پائے۔

ایک سوال کے جواب میں انہوں نے کہا کہ پاور پلے اچھا نہ کھیلنے اور شکست کی ایک وجہ فخرزمان کا نہ ہونا بھی ہوسکتی ہے کیوں کہ فخرزمان ایک ایسا کھلاڑی ہے جو پاور پلے بہت اچھا کھیل سکتا ہے۔

انہوں نے مزید کہا کہ آج ہمارے پاور پلے میں 30 رنز بھی نہیں تھے، جب میں بیٹنگ کے لیے گیا تو مجھے اندازہ تھا کہ رسک لینا پڑے گا جس کی میں نے کوشش کی لیکن اپنی اننگز کو مزید لمبی نہیں کرسکا۔

ہم نے پرانی غلطیاں دہرائیں، کپتان

میچ کے بعد بات کرتے ہوئے قومی ٹیم کے کپتان محمد رضوان کا کہنا تھا کہ ہم نے پچ کی کنڈیشنز دیکھی تھی، شروعات میں پچ بیٹنگ لیے مشکل تھی اور ہم نے وہی پرانی غلطیاں کیں۔

انہوں نے کہا کہ دفاعی چیمپئن ہونے کی وجہ سے ہم پر زیادہ دباؤ ہے، میچ میں دو مرحلون پر ہم نے اپنا مومنٹم کھوایا، یہ شکست تکلیف دہ ہے، ہمارے لیے ہر میچ اہم ہے۔

واضح رہے کہ چیمپئنز ٹرافی کے افتتاحی میچ میں نیوزی لینڈ نے پاکستان کو 60 رنز سے شکست دے دی، پاکستان اپنا اگلا میچ 23 فروری کو دبئی میں بھارت کے خلاف کھیلے گا۔