چیمپئنز ٹرافی: جنوبی افریقہ نے یکطرفہ مقابلے میں افغانستان کو شکست دے دی
انٹرنیشنل کرکٹ کونسل (آئی سی سی) چیمپئنز ٹرافی کے گروپ بی کے پہلے میچ میں جنوبی افریقہ نے یکطرفہ مقابلے کے بعد افغانستان کو 107 رنز سے شکست دے دی۔
کراچی کے نیشنل بینک کرکٹ اسٹیڈیم میں چیمپئنز ٹرافی کے تیسرے میچ میں جنوبی افریقہ نے ٹاس جیت کر پہلے بیٹنگ کا فیصلہ کیا، جو درست ثابت ہوا۔
آئی سی سی چیمپئنز ٹرافی کے گروپ بی کے پہلے میچ میں جنوبی افریقہ نے ریان رکیلٹن کی شاندار سینچری جبکہ ٹیمبا باوما، راسی وین ڈیر ڈوسن اور مارکرم کی نصف سینچریوں کی بدولت 315 رنز بنائے، ہدف کے تعاقب میں افغانستان کی ٹیم 44ویں اوور میں 208 رنز بنا کر آؤٹ ہو گئی۔
جنوبی افریقہ نے ریان رکیلٹن کو میچ کا بہترین کھلاڑی قرار دیا گیا۔
افغان بیٹرز کو شروع سے ہی ہدف کے تعاقب میں مشکلات کا سامنا کرنا پڑا، افغانستان کی ٹیم کو پہلا نقصان صرف 16 رنز پر اٹھانا پڑا جب رحمٰن اللہ گرباز 10 رنز بنا کر آؤٹ ہو گئے۔
پروٹیز نے شاندار باؤلنگ کا سلسہ جاری رکھا اور 23 اوور میں 89 رنز پر افغانستان کے 5 بیٹرز کو پویلین کی راہ دکھائی، عظمت اللہ عمرزئی 18، ابراہیم زدران 17، صدیق اللہ اتل 16 رنز، جبکہ کپتان حشمت اللہ شاہدی کوئی رن نہ بنا سکے۔
افغان ٹیم کی جانب سے واحد بیٹر رحمت شاہ نے جنوبی افریقی باؤلرز کے سامنے مزاحمت دکھائی اور 92 رنز کی شاندار اننگز کھیلی، جس میں ایک چھکا اور 9 چوکے شامل تھے۔
محمد نبی 8، گلبدین نائب 13، راشد خان 18 اور نور احمد 9 رنز بناسکے۔
جنوبی افریقہ کی جانب سے کاگیسو ربادا 3 وکٹیں حاصل کرکے سب سے کامیاب باؤلر رہے، نگیدی اور ویان مولڈر نے 2، 2 جبکہ مارکو جانسن اور کیشو مہاراج نے ایک، ایک کھلاڑی کو آؤٹ کیا۔
قبل ازیں، جب پروٹیز نے ٹاس جیت کر بیٹنگ کا فیصلہ کیا تو ابتدا میں ایسا محسوس ہو رہا تھا کہ جنوبی افریقہ کا یہ فیصلہ غلط ثابت ہوسکتا ہے کیونکہ پروٹیز کو پہلا نقصان صرف 28 رنز پر ہوا، جب ٹوبی ڈی زورزی 11 رنز بنانے کے بعد محمد نبی کی گیند پر کپتان حشمت اللہ شاہدی کے ہاتھوں کیچ آؤٹ ہوگئے۔
تاہم اس کے بعد جنوبی افریقہ نے بہترین کھیل پیش کرتے ہوئے بیٹر ریان رکیلٹن اور کپتان ٹیمبا باوما نے دوسری وکٹ کے لیے 129 رنز کے ساجھے داری قائم کرکے ٹیم کی پوزیشن مستحکم کردی۔
اس موقع پر جنوبی افریقی کپتان 58 رنز بنا کر ہمت ہار بیٹھے، محمد نبی نے ان کا شکار کیا۔
دوسرے اینڈ پر اوپنر ریان رکیلٹن کریز پر موجود رہے اور 103 رنز بنا کر رن آؤٹ ہوئے جبکہ راسی وین ڈیر ڈوسن بھی 52 رنز بنا کر نمایاں رہے۔
فضل حق فاروقی کی باؤلنگ پر رحمت شاہ نے بہترین کیچ لے کر ڈیوڈ ملر کی اننگز کا خاتمہ کیا، وہ صرف 14 رنز بنا سکے۔
ایڈن مارکرم 36 گیندوں پر 52 رنز کی جارحانہ اننگز کھیل کر ناٹ آؤٹ رہے جبکہ ویان مولڈر نے 12 رنز بنائے، اس طرح پروٹیز نے مقررہ 50 اوورز میں 6 وکٹوں کے نقصان پر 315 رنز بنائے اور افغانستان کو جیت کے لیے 316 رنز کا ہدف دیا۔
افغانستان کی جانب سے محمد نبی نے 2 جبکہ نور احمد، عظمت اللہ عمر زئی اور فضل الحق فاروقی نے ایک، ایک وکٹ حاصل کی۔
قبل ازیں ٹاس کے بعد گفتگو کرتے ہوئے جنوبی افریقہ کے کپتان نے کہا کہ ہمیں خود پر اعتماد ہے، اچھا ہدف دینے کی کوشش کریں گے، پچ کے بارے میں کوئی اندازہ نہیں لگاسکتے۔
افغانستان کے کپتان حشمت اللہ شاہدی نے کہا کہ ہم ٹاس جیت جاتے تو ہم بھی بیٹنگ ہی کرتے، ہم نے جنوبی افریقہ کے خلاف پہلے بھی اچھی کرکٹ کھیلی ہے، جنوبی افریقہ کے خلاف اچھی شروعات کرتے ہیں تو خوشی ہوگی، اچھے کھیل کا مظاہرہ کریں گے، کوشش کریں گے کہ جلد وکٹیں لیں۔
واضح رہے کہ یہ گروپ بی کا پہلا میچ ہے۔ اس سے قبل گروپ اے کے دو میچز ہوچکے ہیں، پہلا میچ پاکستان بمقابلہ نیوزی لینڈ تھا جس میں قومی ٹیم کو شکست ہوئی تھی جبکہ دوسرا میچ بھارت بمقابلہ بنگلہ دیش تھا جس میں بھارتی کرکٹ ٹیم نے بنگلہ دیش کو 6 وکٹوں سے مات دے دی تھی۔
لائیو ٹی وی