ٹیکس نیٹ میں موجود ریٹیلرز پر مزید بوجھ نہیں ڈالا جائے گا، شہباز شریف
وزیر اعظم شہباز شریف نے ریٹیلرز کے مسائل کے حل کے لیے کمیٹی تشکیل دینے کی ہدایت کرتے ہوئے کہا ہے کہ ٹیکس نیٹ میں موجود ریٹیلرز پر مزید بوجھ نہیں ڈالا جائے گا۔
سرکاری خبر رساں ادارے ’اے پی پی‘ کی رپورٹ کے مطابق پاکستان ریٹیل بزنس کونسل کے چیئرمین زیاد بشیر کی قیادت میں وفد سے گفتگو کرتے ہوئے شہبازشریف کا کہنا تھا کہ ایسے ریٹیلرز جو ٹیکس نیٹ میں موجود ہیں ان پر ٹیکس کا مزید بوجھ نہیں ڈالا جائے گا، جبکہ استعمال شدہ اشیا کی آڑ میں ہونے والی اسمگلنگ کے سد باب کے لیے بھی اقدامات لیے جا رہے ہیں۔
اعلامیے کے مطابق ملاقات میں میں چیئرمین پاکستان ریٹیل بزنس کونسل زیاد بشیر، شاہد حسین سی ای او سروس سیلز کارپوریشن، شہریار بخش سی ای او بیچ ٹری کے ساتھ ساتھ وفاقی وزرا احسن اقبال، جام کمال خان، احد خان چیمہ، محمد اورنگزیب، رانا تنویر حسین، وزیرِ مملکت علی پرویز ملک اور متعلقہ اعلیٰ حکام موجود تھے۔
وزیرِ اعظم نے ریٹیلرز کے وفد کا خیر مقدم کیا اور مسائل کے حل کی یقین دہانی کرائی کہ ایسے ریٹیلرز جو ٹیکس نیٹ میں موجود ہیں ان پر ٹیکس کا مزید بوجھ نہیں ڈالا جائے گا، ایسے تمام ریٹیلرز جو ٹیکس نہیں دیتے ان کو ٹیکس نیٹ میں لانے کے لیے ترجیحی بنیادوں پر اقدامات کر رہے ہیں۔
وزیرِاعظم شہباز شریف کا کہنا تھا کہ استعمال شدہ اشیا کی آڑ میں ہونے والی اسمگلنگ کے سد باب کے لیے بھی اقدامات تیز کر رہے ہیں، مقامی صنعت کو جدت کو اپناتے ہوئے اپنی اشیا کی برآمدات کے لیے جدید ٹیکنالوجی اپنانی چاہئے تاکہ وہ بین الاقوامی مارکیٹ کا مقابلہ کر سکیں۔
انہوں نے کہا کہ ایف بی آر کی دیگر اصلاحات کے ساتھ ساتھ حکومت معیشت کو کیش لیس بنانے کے لیے اقدامات کر رہی ہے۔
اعلامیے کے مطابق ملاقات میں وفد کے ارکان نے ملکی معیشت کے استحکام کے لیے وزیرِ اعظم اور ان کی ٹیم کو خراج تحسین پیش کرتے ہوئے کہا کہ مہنگائی اور شرح سود میں خاطر خواہ کمی سے مصنوعات کی کھپت اور پیدوار میں اضافہ ہو رہا ہے جو خوش آئند ہے۔
ان کا کہنا تھا کہ امید ہے کہ ان اقدامات سے شرح مہنگائی میں مزید کمی آئے گی، صنعتوں کا پہیہ چلنے سے روزگار کے نئے مواقع پیدا ہو رہے ہیں، حکومتی اصلاحات خوش آئند ہیں اور ان کے معیشت پر دور رس مثبت اثرات مرتب ہوں گے۔
اعلامیے کے مطابق ریٹیلرز کو ٹیکس نیٹ میں لانے سے محصولات میں اضافہ ہوگا، ایسے ریٹیلرز جو ٹیکس نیٹ میں موجود ہیں ان کے مسائل کے حل کے لیے حکومتی اقدامات کے معترف ہیں۔
لائیو ٹی وی