پبلک اکاؤنٹس کمیٹی میں پاور ڈویژن 24-2023 کے آڈٹ اعتراضات کا جائزہ لیا گیا جبکہ اجلاس کے دوران مالی سال 23-2022 میں 9 ڈسکوز کے ڈیفالٹرز پر 877 ارب روپے سے زائد کے واجبات ہونے کا انکشاف ہوا ہے۔

آڈٹ حکام نے کمیٹی کو بتایا کہ پاور ڈویژن کو ریکوری کے لیے 118 خطوط لکھے ہیں، نان ریکوری میں سب سے ذیادہ کیسز کیسکو کے ہیں، کمیٹی نے بجلی کی تقسیم کار کمپنیوں کے سب سے بڑے 300 ڈیفالٹرز کی فہرست طلب کر لی۔

جنید اکبر کی زیرِ صدارت پارلیمنٹ کی پبلک اکاؤنٹس کمیٹی کا اجلاس پارلیمنٹ ہاؤس میں منعقد ہوا، اجلاس میں پاور ڈویژن کی 24-2023 کے آڈٹ پیروں کا جائزہ لیا گیا۔

آڈٹ حکام نے بتایا کہ مالی سال 23-2022 میں 9 ڈسکوز کی جانب سے ڈیفالٹرز سے 877 ارب روپے سے زائد کے واجبات ہیں، جس پر سیکریٹری پاور ڈویژن نے بتایا کہ پاور ڈویژن نے اس پیرا پر ڈی اے سی کا اجلاس نہیں کیا ہے، اب تک ڈیفالٹرز سے 162 ارب روپے ریکور کر لیے گئے ہیں۔

جس پر سینیٹر افنان اللہ نے کہا کہ نان ریکوری کے سب سے ذیادہ کیسز کوئٹہ الیکٹرک سپلائی کمپنی کے ہیں، سینیٹر شبلی فراز کا کہنا تھا کہ واجبات کے حساب سے ہمیں 300 بڑے موجودہ ڈیفالٹرز کی فہرست دی جائے۔

اجلاس میں رکن کمیٹی خالد مگسی بلوچستان کی صورتحال پر پھٹ پڑے، ان کا کہنا تھا کہ بلوچستان میں امن و امان کی صورتحال اب یہ ہے کہ وہاں کوئی جا بھی نہیں سکتا ہے، بلوچستان کے لوگوں کے پاس اب صرف ہتھیار اٹھانے کا آپشن رہ گیا ہے۔

ان کا کہنا تھا کہ بلوچستان میں کالعدم بی ایل اے والے سر عام سڑکوں پر گھوم رہے ہیں،کوئٹہ میں واجبات کی وصولی اب نہیں ہو سکتی، سب سے بڑی ڈیفالٹر حکومت بلوچستان خود ہے۔

سیکریٹری پاور ڈویژن نے کہا کہ ڈسکوز نے 162 ارب کی ریکوری کے ورکنگ پیپرز جمع کروائے ہیں،واجبات کی ریکوری کی پروگریس خود مانیٹر کروں گا، چیئرمین کمیٹی نے آڈیٹر جنرل کو آئندہ روز تک 162 ارب کی ریکوری کی تصدیق کی ہدایت کردی۔

تاہم پبلک اکاؤنٹس کمیٹی نے بجلی کی تقسیم کار کمپنیوں کے سب سے بڑے 300 ڈیفالٹرز کی فہرست طلب کرلی، چیئرمین کمیٹی نے پاور ڈویژن کو ہر ماہ میں دو ڈی اے سی کرنے کی ہدایت کرتے ہوئے کہا کہ ڈسکوز ریکوری پر ماہانہ رپورٹ بھی جمع کرائیں، پاور ڈویژن کی جانب سے الیکٹرک سامان نہ ہٹانے اور 501 ارب سے زائد بقایا جات کی عدم وصولی کا پیرا زیر غور آیا۔

آڈٹ حکام نے بتایا کہ ہم نے پاور ڈویژن کو ریکوری کے لیے 118 خطوط لکھے ہیں، پبلک اکاؤنٹس کمیٹی میں ڈسکوز کے افسران کی جانب سے مفت بجلی حاصل کرنے کے معاملہ بھی زیر بحث آیا، سیکریٹری پاور نے بتایا کہ وفاقی حکومت نے مفت یونٹس ختم کرنے کا فیصلہ کر لیا، جس پر ملازمین نے عدالتوں سے رجوع کیا ہے۔

ڈسکوز کو دی جانے والی مفت بجلی کے اخراجات کی تفصیل طلب

پی اے سی نے اگلے اجلاس میں ڈسکوز کو دی جانے والی مفت بجلی کے اخراجات کی تفصیل طلب کر لی، اجلاس میں پاور ڈویژن کے غیر مجاز توسیع شدہ لوڈ کے لیے صارفین کو غیر ضروری فائدہ دینے کا آڈٹ پیرا زیر غور آیا۔

آڈٹ حکام نے بتایا کہ7689 صارفین مقررہ لوڈ سے اضافی لوڈ استعمال کر رہے تھے جس سے کمپنیوں پر اضافی بوجھ پڑا،کمیٹی نے معاملہ پر انکوائری کرنے کی ہدایت کردی، ڈسکوز کے افسران اور اہلکاروں کی جانب سے 337 کیسز میں ایک ارب سے زائد روپے کی بدعنوانی کا پیرا زیر غور آیا۔

سیکریٹری پاور نے بتایا کہ فیسکو میں 7 لاکھ سے زائد ریکوری کر لی ہے، این ٹی ڈی سی سے 16 لاکھ سے زائد رقم ریکور کر لی، آڈٹ حکام نے بتایا کہ بدعنوانی کے کیسز ایف آئی اے اور نیب کے حوالے بھی کیے گئے۔

نیب حکام کا کہنا تھا کہ کہ میرپور خاص، ٹنڈو آدم میں بدعنوانی کی تحقیقات نیب کر رہا ہے، اب تک کل 33 بندے گرفتار کیے گئے ہیں۔

اجلاس میں 6 ڈسکوز کی جانب سے غلط ریڈنگ اور دیگر محکمانہ غلطیوں کے باعث 21 ارب سے زائد رقم کی صارفین کو واپسی کا پیرا زیر غور آیا، آڈٹ حکام نے بتایا کہ اوور بلنگ میں ملوث ڈسکو اہلکاروں کے خلاف کوئی کارروائی نہیں کی گئی ہے۔

کمیٹی ممبر بلال احمد خان نے کہا کیا اوور بلنگ کی غفلت کیا جان بوجھ کر کی گئی؟ کمیٹی ممبر حنا ربانی نے کہا کہ پی اے سی کو اس عمل کا سخت نوٹس لینا چاہیے، پاور سیکٹر میں کرپشن سے ملک تباہ ہورہا ہے، پاور سیکٹر نے ملک کی معیشت کو تباہی کے دہانے پر لاکھڑا کردیا ہے،پاور سیکٹر میں اصلاحات کی ضرورت ہیں۔

آڈٹ حکام نے بتایا کہ پاور سیکٹر کی حالت کچھ یوں ہے کہ میپکو کے اندر 152 افسران غلط ریڈنگ میں ملوث تھے، ان میں سے 101 کو صرف خبردار کیا گیا، کوئی ایکشن نہیں لیا گیا ہے، جس پر کمیٹی ممبران نے تشویش کا اظہار کیا، چیئرمین کمیٹی نے معاملہ کو ایک ماہ میں نمٹانے کا حکم دیتے ہوئے کہا کہ جن افسران کے خلاف کاروائی کی گئی، آئندہ اجلاس میں رپورٹ جمع کرائیں۔

بعد ازاں اجلاس میں بورڈ آف انویسٹمنٹ کے آڈٹ اعتراضات 24-2023 کا جائزہ لیا گیا، آڈٹ حکام نے بتایا کہ مالی سال 22-2021 کے دوران 5.5 ملین کی مختلف سروسز مقابلہ کے بغیر ہائیر کی گئی ہیں، چیئرمین پی اے سی نے 15 روز کے اندر معاملہ نمٹانے کی ہدایت کردی۔

اجلاس میں کانفرنس کے انعقاد کے لیے پیپرا قواعد کے برخلاف سرمایہ کاری بورڈ کی جانب سے نجی ہوٹلز کو 83 لاکھ سے زائد ادائیگیوں کا پیرا زیر غور آیا، جس پر بورڈ آف انویسٹمنٹ حکام نے بتایا کہ چینی حکام کی سیکیورٹی کے پیش نظر مقابلہ کے بغیر ادائیگیاں کی گئیں، پبلک اکاؤنٹس کمیٹی نے سرمایہ کاری بورڈ کو آئندہ کانفرنس کے انعقاد سے قبل پیپرا قواعد پر عملدرآمد کی ہدایت کردی۔