دوطرفہ تعلقات بڑھانے کیلئے شہباز شریف 2 روزہ دورے پر ازبکستان پہنچ گئے
وزیر اعظم شہباز شریف دوطرفہ تعلقات بڑھانے کے لیے 2 روزہ سرکاری دورے پر ازبکستان پہنچ گئے۔
سرکاری خبر رساں ادارے ’اے پی پی‘ نے رپورٹ کیا کہ وزیراعظم محمد شہباز شریف ازبکستان کے صدر شوکت مرزیایوف کی خصوصی دعوت پر 2 روزہ دورہ پر تاشقند پہنچے۔
نائب وزیراعظم و وزیرِ خارجہ محمد اسحٰق ڈار، وزیرِ تجارت جام کمال خان، وزیرِ سرمایہ کاری و نجکاری عبدالعلیم خان، وزیرِ اطلاعات و نشریات عطا اللہ تارڑ اور معاون خصوصی طارق فاطمی وزیرِ اعظم کے دورہ ازبکستان میں پاکستانی وفد میں شامل ہیں۔
ازبکستان کے وزیراعظم عبداللہ عاریپوف، ازبک وزیرِ خارجہ بختیار سیدوف، تاشقند کے میئر شوکت عمرزاکوف، ازبکستان کے پاکستان میں سفیر علی شیر تختائیف اور پاکستان کے ازبکستان میں سفیر احمد فاروق سمیت اعلیٰ سفارتی و سرکاری اہلکاروں نے وزیرِ اعظم شہباز شریف کا استقبال کیا۔
وزیراعظم تاشقند میں یادگار آزادی کا دورہ کریں گے، جہاں وزیراعظم پھولوں کی چادر چڑھا کر ازبکستان کی عظیم تاریخی شخصیات کو خراج عقیدت اور ازبکستان کی تعمیر و ترقی، غیور و محنتی ازبک عوام کے لیے نیک خواہشات کا اظہار کریں گے۔
وزیراعظم کو اس موقع پر یادگار پر تعمیر کی گئی ازبکستان کی 3 ہزار سالہ تاریخ کی منبت کاری کا دورہ کرایا جائے گا اور بریفنگ دی جائے گی۔
وزیر اعظم شہباز شریف دورے کے دوران ازبک صدر شوکت مرزیایوف سے دو طرفہ ملاقات بھی کریں گے جس میں ازبکستان اور پاکستان کے مابین علاقائی روابط، تجارت، سرمایہ کاری، توانائی، دفاع، سلامتی، علاقائی استحکام اور تعلیم کے شعبوں میں تعاون کے مزید فروغ پر گفتگو ہوگی۔
اے پی پی کے مطابق دونوں رہنماؤں کے مابین باہمی دلچسپی کے عالمی و علاقائی امور پر تبادلہ خیال بھی ہوگا۔ ملاقات کے بعد پاکستان اور ازبکستان کے مابین دوطرفہ تعاون کی مفاہمتی یادداشتوں و معاہدوں پر بھی دستخط ہوں گے۔
پاکستان اور ازبکستان کی کاروباری و سرمایہ کار برادری کے مابین تعاون کو بڑھانے کے لیے تاشقند میں پاکستان اور ازبکستان بزنس فورم کا انعقاد بھی ہوگا جس میں وزیراعظم شہباز شریف خطاب بھی کریں گے۔ وزیرِ اعظم ازبکستان کی تعمیری صنعت کے مشاہدے کے لیے تاشقند میں قائم ٹیکنو-پارک کا دورہ بھی کریں گے۔
واضح رہے کہ 2023 میں پاکستان اور ازبکستان نے دو طرفہ تجارت میں اضافے کے لیے ایک ارب ڈالر کے معاہدے پر دستخط کیے گئے تھے، وزارت اقتصادی امور کی جانب سے جاری بیان میں کہا گیا کہ تھا ازبکستان کے دارالحکومت تاشقند میں پاکستان-ازبکستان بین الحکومتی کمیشن برائے تجارت-معیشت اور سائینٹیفک-ٹیکنیکل تعاون (آئی جی سی) کا آٹھواں اجلاس ہوا تھا، جہاں معاہدے پر دستخط ہوئے تھے۔
مزید کہا گیا کہ تھا ’آئی جی سی کا سب سے اہم نتیجہ ایک ارب ڈالر کے تجارتی معاہدے پر دستخط ہیں، جس سے مصنوعات کے تبادلے اور مخصوص خدمات کے تبادلے کو فروغ ملے گا اور تجارت کا عمل بھی آسان ہوجائے گا‘۔
جنوری 2025 میں ازبکستان نے رواں سال ازبکستان اور کراچی کے درمیان براہ راست پرواز کے نئے روٹ کو متعارف کرانے کے منصوبے کا اعلان کرتے ہوئے اسے دونوں ممالک کے درمیان قریبی تعلقات کو فروغ دینے کے لیے ایک اہم قدم قرار دیا تھا۔
ازبکستان کےسفیر نے یہ اعلان 2 سے 4 جنوری تک کراچی کے اپنے سرکاری دورے کے دوران ٹریڈ ڈیولپمنٹ اتھارٹی آف پاکستان ( ٹی ڈی اے پی) ، کراچی چیمبر آف کامرس اینڈ انڈسٹری (کے سی سی آئی) اور تاجر برادری کے اراکین سے خطاب کرتے ہوئے کیا تھا۔
لائیو ٹی وی