آسکر ایوارڈز کا میلہ 2 مارچ کو سجے گا
دنیا کے معتبر ترین فلمی ایوارڈز ’آسکر‘ کا میلہ امریکا کے مقامی وقت کے مطابق 2 مارچ کو شام 7 بجے لاس اینجلس میں سجے گا۔
خبر رساں ادارے ’ایسوسی ایٹڈ پریس‘ (اے پی) کے مطابق رواں برس جنوری میں لاس اینجلس میں لگی بدترین آگ کے باعث آسکر ایوارڈز کی تقریب منسوخ کیے جانے کا امکان تھا لیکن اب تقریب اپنے مقررہ وقت پر ہوگی۔
متعدد شوبز شخصیات نے منتظمین سے مطالبہ کیا تھا کہ لاس اینجلس میں لگی آگ کے باعث تقریب کو منسوخ کیا جائے اور انتظامیہ نے نامزدگیوں کا اعلان دو بار تاخیر سے کیا تھا لیکن تقریب کو منسوخ نہیں کیا۔
آسکر کے 97 ویں میلے کی تقریب لاس اینجلس کے تاریخی ڈول بائے تھیٹر میں ہوگی، جہاں کئی دہائیوں سے تقریب ہوتی آ رہی ہے۔
آسکر ایوارڈز کی تقریب کو پہلی بار متعدد اسٹریمنگ ویب سائٹس سمیت اے بی سی ٹی وی اور یوٹیوب پر بھی براہ راست دکھایا جائے گا۔
آسکر ایوارڈز کی تقریب امریکا کے مقامی وقت کے مطابق اتوار مارچ شام 7 بجے شروع ہوگی، یعنی تقریب پاکستان کے مقامی وقت کے مطابق 3 مارچ صبح 5 بجے شروع ہوگی۔
’آسکر‘ ایوارڈز کی نامزدگیوں کا اعلان جنوری میں کیا گیا تھا، میکسیکو کی نیٹ فلیکس فلم ’ایملیا پیریز‘ (Emilia Perez) نے مجموعی طور پر 13 نامزدگیاں حاصل کی تھیں۔
اسی فلم میں ٹرانس جینڈر خاتون کا کردار ادا کرنے والی اداکارہ کرلا صوفیہ گسکون (Karla Sofía Gascón) بھی بہترین اداکارہ کے لیے نامزد ہوئی تھیں، وہ نامزد ہونے والی پہلی ٹرانس جینڈر اداکارہ بھی بنی تھیں۔
’دی بروٹلسٹ، وکڈ اور دی سبسٹینس‘ فلموں نے بھی ترتیب وار 10 نامزدگیاں حاصل کی تھیں۔ آسکر نامزدگیوں میں 10 فلموں کا بہترین فلم کے لیے آپس میں مقابلہ ہوگا جب کہ بہترین ہدایت کار کے لیے 5 ڈائریکٹرز میں مقابلہ ہوگا۔
اس سال بہترین اداکارہ کے لیے سنتھیا ایریو، کرلا صوفیہ، مکی میڈیسن، فرنانڈا ٹورس اور ڈیمی مور میں مقابلہ ہوگا جب کہ بہترین اداکار کے لیے ایڈرین بروڈی، ٹموتھی چالمیٹ، کالمن ڈومنگو، رالف فینس اور سیبسٹن اسٹان کے درمیان مقابلہ ہوگا۔
لائیو ٹی وی