کابینہ نے پاکستان انجینئرنگ کونسل کی کارکردگی کا جائزہ لینے کیلئے کمیٹی بنادی
وفاقی کابینہ نے پاکستان انجینئرنگ کونسل کی کارکردگی کا جائزہ لینے کے لیے کمیٹی تشکیل دے دی، وفاقی وزیر قانون و انصاف 6 رکنی کمیٹی کے سربراہ ہوں گے، کمیٹی کونسل کے خلاف موصول شکایات اور عوام کے ادارے سے متعلق تحفظات کی جانچ پڑتال کرے گی۔
ڈان نیوز کے مطابق حکومت نے پاکستان انجینئرنگ کونسل کی کارکردگی کا جائزہ لینے سے متعلق اہم فیصلہ کرلیا، وفاقی کابینہ نے پاکستان انجینئرنگ کونسل کی کارکردگی کا جائزہ لینے کے لیے کمیٹی تشکیل دے دی ہے۔
وفاقی وزیر قانون و انصاف کی سربراہی میں کمیٹی 6 رکنی اراکین پر مشتمل ہوگی، کمیٹی ارکان میں وزیر سائنس و ٹیکنالوجی اور وزیر قومی خوراک شامل ہوں گے، سیکریٹری صنعت و پیداوار، قانون و انصاف، اور سائنس و ٹیکنالوجی بھی کمیٹی ارکان میں شامل ہیں۔
پاکستان انجینئرنگ کونسل کی کارکردگی کا جائزہ لینے کے لیے کمیٹی کے ٹی او آرز طے کر لیے گئے ہیں، کمیٹی پاکستان انجینئرنگ کونسل ایکٹ 1975 کے تحت ادارے کی کارکردگی کا جائزہ لے گی، کمیٹی کونسل کے خلاف موصول شکایات اور عوام کے ادارے سے متعلق تحفظات کی جانچ پڑتال کرے گی، کمیٹی ایکٹ میں قانونی سقم اور کمزوریوں کا تعین کرے گی۔
کمیٹی کو وزارت سائنس و ٹیکنالوجی ڈویژن سیکریٹریٹ تعاون فراہم کرے گا، کمیٹی 3 ہفتوں میں رپورٹ کابینہ کو پیش کرے گی۔
لائیو ٹی وی