پشاور ایئرپورٹ پر فیصل جاوید کو عمرے کی ادائیگی کیلئے جانے سے روک دیا گیا
پاکستان تحریک انصاف (پی ٹی آئی) کے سابق سینیٹر فیصل جاوید کو عمرے کی ادائیگی کے لیے جانے سے روک دیا گیا۔
ڈان نیوز کے مطابق فیصل جاوید عمرے کی ادائیگی کے لیے پشاور ایئر پورٹ سے پرواز میں سوار ہوئے تھے، تاہم متعلقہ حکام نے انہیں آف لوڈ کر دیا۔
فیصل جاوید نے بیرون ملک جانے سے روکے جانے کے خلاف پشاور ہائی کورٹ میں توہین عدالت کی درخواست دائر کردی۔
یاد رہے کہ پشاور ہائی کورٹ نے ایک روز قبل ہی پاکستان تحریک انصاف کے رہنما فیصل جاوید کا نام پرووژنل نیشنل آئیڈینٹیفکیشن لسٹ (پی این آئی ایل) سے نکالنے کا حکم دیا تھا۔
پشاور ہائی کورٹ نے گزشتہ سماعت کا دو صفحات پر مشتمل حکم نامہ جاری کیا تھا، عدالتی حکم نامے کے مطابق درخواست گزار عمرے کی ادائیگی کے لیے سعودی عرب جانا چاہتے ہیں، درخواست گزار کا عمرہ ادائیگی کے لیے متعلقہ ریکارڈ فائل پر موجود ہے لہٰذا درخواست گزار کا نام پی این آئی ایل سے نکالا جائے۔
عدالتی حکم نامے میں کہا گیا تھا کہ درخواست گزار کی عمرہ ادائیگی سے واپسی پر قانون نافذ کرنے والے ادارے معاملے کو پھر دیکھیں، درخواست گزار اس وقت کسی قانون نافذ کرنے والے اداروں کو مطلوب نہیں۔
عدالت کے مطابق درخواست گزار کے وکیل نے بتایا کہ جو مقدمات ہیں، ان میں درخواست گزار ضمانت پر ہے جب کہ درخواست گزار کچھ مقدمات میں بری بھی ہوچکے ہیں۔
بعد ازاں، عدالت نے سماعت 15 اپریل تک ملتوی کردی۔
لائیو ٹی وی