سوشل میڈیا پر پروپیگنڈا، جے آئی ٹی نے چیئرمین پی ٹی آئی بیرسٹر گوہر سمیت اہم رہنماؤں کو طلب کر لیا
سوشل میڈیا پر منفی پروپیگنڈے کے الزام کی تحقیقات کے لیے مشترکہ تحقیقاتی ٹیم (جے آئی ٹی) نے پاکستان تحریک انصاف (پی ٹی آئی) کے چیئرمین بیرسٹر گوہر، سلمان اکرم راجا، رؤف حسن سمیت دیگر اہم رہنماؤں کو طلب کر لیا۔
ڈان نیوز کے مطابق انسپکٹر جنرل (آئی جی) پولیس اسلام آباد کی سربراہی میں قائم جے آئی ٹی نے پی ٹی آئی کے مزید 15 افراد کو طلبی کے نوٹس جاری کیے ہیں، ان میں سابق اسپیکر قومی اسمبلی اسد قیصر، کنول شوزب، تیمور سلیم، شاہ فرمان، عون عباس، عالیہ حمزہ ملک، شہباز شبیر اور وقاص اکرم شامل ہیں۔
ذرائع نے بتایا کہ جے آئی ٹی نے 15 افراد کو 7 مارچ دن 12 بجے طلب کیا ہے۔
اس سے قبل سوشل میڈیا پر منفی پروپیگنڈا کرنے والوں کے خلاف گھیرا تنگ کرنے کا فیصلہ کرتے ہوئے جے آئی ٹی نے پی ٹی آئی سوشل میڈیا ٹیم کے 10 ارکان کو طلبی کے نوٹس جاری کیے۔
ڈان نیوز کے مطابق جے آئی ٹی نے پی ٹی آئی سوشل میڈیا ٹیم کو طلبی کے نوٹس جاری کر دیے، پی ٹی آئی سوشل میڈیا ٹیم کے 10 افراد کو بذریعہ نوٹس کل دوپہر 12 بجے طلب کیا گیا۔
نوٹس کے مطابق آصف رشید، محمد ارشد، صبغت اللہ ورک، اظہرمشوانی اور محمد نعمان افضل، جبران الیاس، سلمان رضا، زلفی بخاری، موسیٰ ورک، علی حسنین کو طلب کیا گیا ہے۔
مشترکہ تحقیقاتی ٹیم آئی جی اسلام آباد کی سربراہی میں پیکا ایکٹ کے تحت کام کر رہی ہے، جے آئی ٹی کا مقصد قانون کے مطابق مجرموں کی شناخت اور کارروائی کرنا ہے۔
سرکاری ریڈیو پاکستان نے رپورٹ کیا کہ جے آئی ٹی کے پاس اس معاملے میں ان افراد کے ملوث ہونے کے ٹھوس شواہد موجود ہیں، جے آئی ٹی کی تشکیل الیکٹرانک کرائمز ایکٹ 2016 کے سیکشن 30 کے تحت کی گئی تھی۔
لائیو ٹی وی