ٹانک: سیکیورٹی فورسز کا خفیہ اطلاع پر آپریشن، 3 خارجی دہشتگرد ہلاک
سیکیورٹی فورسز نے خیبرپختونخوا کے ضلع ٹانک میں خفیہ اطلاع پر آپریشن کیا جس کے نتیجے میں 3 خارجی دہشت گرد ہلاک ہوگئے۔
پاک فوج کے شعبہ تعلقات عامہ (آئی ایس پی آر) کی جانب سے جاری بیان میں کہا گیا کہ 8 مارچ 2025 کو سیکیورٹی فورسز نے ضلع ٹانک میں فتنہ الخوراج کی موجودگی پر انٹیلی جنس کی بنیاد پر آپریشن کیا۔
ترجمان پاک فوج کے مطابق آپریشن کے دوران سیکیورٹی فورسز نے خوارج کے ٹھکانے کو مؤثر طریقے سے نشانہ بنایا ، جس کے نتیجے میں 3 خارجی دہشت گرد مارے گئے۔
آئی ایس پی آر کا کہنا تھا کہ ہلاک ہونے والے خارجی دہشت گردوں کے قبضے سے اسلحہ اور گولہ بارود بھی برآمد کیا گیا جو سیکیورٹی فورسز کے ساتھ ساتھ معصوم شہریوں پر حملوں میں ملوث تھے۔
ترجمان پاک فوج کا مزید کہنا تھا کہ علاقے میں دیگر خارجی دہشت گردوں کے مکمل خاتمے کے لیے سینیٹائزیشن آپریشن جاری ہے جبکہ سیکیورٹی فورسز دہشت گردی کے خاتمے کے لیے پرعزم ہیں۔
واضح رہے کہ گزشتہ روز سیکیورٹی فورسز نے فتنۃ الخوارج کے حملہ آوروں کی بنوں چھاؤنی میں دراندازی کی کوشش ناکام بناتے ہوئے تمام 16 دہشت گردوں کو ہلاک کردیا تھا۔
آئی ایس پی آر کے مطابق دہشت گردوں سے جھڑپ کے دوران 5 جوانوں نے جام شہادت نوش کیا جب کہ حملے میں 13 معصوم شہری شہید اور 32 زخمی بھی ہوئے تھے۔
لائیو ٹی وی