روسی فورسز کا یوکرین پر میزائل حملہ، 14 افراد ہلاک، 37 زخمی
یوکرینی وزارت داخلہ نے کہا ہے کہ روس نے خارکیو ریجن اور مشرقی شہر ڈوبروپیلیا میں میزائل اور ڈرون حملے کیے، جس کے نتیجے میں 5 بچوں سمیت 14 افراد ہلاک اور 37 زخمی ہوگئے۔
غیر ملکی خبر رساں ادارے ’رائٹرز‘ کے مطابق وزارت داخلہ نے بتایا کہ روسی فورسز نے ڈوبروپیلیا میں بلیسٹک میزائل، متعدد راکٹس اور ڈرونز سے حملے کیے، جس سے 8 منزلہ عمارت اور 30 گاڑیاں تباہ ہو گئیں، جبکہ حملے سے 5 بچوں سمیت 11 افراد ہلاک اور 30 دیگر زخمی ہوگئے۔
یوکرینی وزارت کا مزید کہنا تھا کہ خارکیو ریجن کے شمال مشرق میں علیحدہ ڈرون حملے میں تین شہری ہلاک اور 7 زخمی ہو گئے۔
یوکرینی صدر ولادیمیر زیلنسکی نے فیس بک پر جاری بیان میں بتایا کہ ایسے حملوں سے ظاہر ہوتا ہے کہ روسی مقاصد تبدیل نہیں ہوئے، لہٰذا یہ ضروری ہے کہ زندگیوں کی حفاظت کے لیے اپنی بہترین کوششیں جاری رکھیں، فضائی دفاع کو مضبوط کریں اور روس کے خلاف پابندیوں میں اضافہ کریں، ہر وہ چیز جس سے ولادیمیر پیوٹن جنگ کے اخراجات کررہا ہے، اسے لازمی تباہ ہونا چاہیے۔
جمعہ کو روسی افواج نے یوکرین کے ساتھ انٹیلی جنس شیئرنگ روکنے کے بعد سے اپنے پہلے بڑے میزائل حملے میں یوکرین کے توانائی اور گیس کے بنیادی ڈھانچے کو نقصان پہنچایا تھا، جس سے کیف پر دباؤ بڑھ رہا ہے کیونکہ صدر ڈونلڈ ٹرمپ جنگ کو تیزی سے ختم کرنے کے خواہاں ہیں۔
فوجی تجزیہ کاروں کا کہنا ہے کہ امریکی فوجی امداد اور انٹیلی جنس میں وقفہ یوکرین کے فضائی دفاع کو کمزور کر سکتا ہے کیونکہ یہ جدید میزائل حملوں کو مؤثر طریقے سے ٹریک کرنے نہیں کر پاتا۔
جنگ شروع ہونے سے قبل ڈوبروپیلیا میں تقریباً 28 ہزار افراد رہائش پذیر تھے، جو پوکروسک کے اہم مرکز کے شمال میں فرنٹ لائن سے 22 کلومیٹر دور ہے، جہاں روسی افواج ہفتوں سے حملہ کر رہے ہیں۔
کیف اور ماسکو کو مذاکرات کی میز پر بٹھانے کی امریکی کوششیں جاری ہیں، تاہم دونوں فریقین کے فائدہ حاصل کرنے کی کوششوں میں حملے تاحال جاری ہیں۔
ایک مقامی اہلکار نے بتایا کہ سرگٹنیفٹیگز کی کریشی آئل ریفائنری کو یوکرین کے ایک بڑے ڈرون حملے کے دوران ملبہ گرنے سے نقصان پہنچا۔
روسی افواج نے حالیہ ہفتوں میں کرسک سے یوکرینی فوجیوں کو نکالنے کی کوششیں تیز کر دی ہیں، جب کیف نے سرحد پر حملہ کیا اور اگست میں روسی علاقے کے ایک حصے پر قبضہ کر لیا تھا۔
روسی وزارت دفاع نے آج بتایا کہ اس کے فوجیوں نے کرسک کے علاقے میں تین دیہات کو یوکرینی فورسز سے واپس لے لیا۔
لائیو ٹی وی