حکومت پاکستان اور عالمی مالیاتی فنڈ (آئی ایم ایف) کے درمیان مذاکرات مکمل ہوگئے، ذرائع کےمطابق حکومت نے اخراجات کے کنٹرول، خاص طور پر ترقیاتی پروگرام کے ذریعے مالی اہداف کو برقرار رکھنے کا اعادہ کیا، ایگزیکٹو بورڈ کی منظوری کے بعد پاکستان کو ایک ارب ڈالر سے زائد قرض کی قسط جاری ہوگی۔

ڈان نیوز کے مطابق آئی ایم ایف نے پاکستان سے متعلق اعلامیہ بھی جاری کردیا، آئی ایم ایف کی جانب سے جاری اعلامیے میں بتایا گیا ہے کہ پاکستان کے ساتھ 7 ارب ڈالر قرض پروگرام پر جائزے کے لیے مذاکرات میں کلائمیٹ فنانسنگ کے لیے بھی بات چیت ہوئی۔

پاکستان کے ساتھ قرضوں کی ادائیگی کی مینجمنٹ، توانائی کے شعبے میں لاگت کم کرنے اور توانائی شعبے کی بہتری، معاشی ترقی کی شرح بڑھانے اور صحت عامہ کی بہتری کے لیے بھی بات چیت ہوئی۔

اعلامیہ میں کہا گیا ہے کہ تعلیم کے فروغ، سماجی تحفظ اورموسمیاتی تبدیلیوں کے اثرات کم کرنے پر تبادلہ خیال ہوا، پاکستان نے موجودہ قرض پروگرام پر سختی سے عمل درآمد کیا اور بات چیت مثبت رہی، مزید بات چیت آن لائن جاری رہے گی۔

آئی ایم ایف نے بہتری تسلیم کی، محمد اورنگزیب

وزیر خزانہ محمد اورنگزیب نے کہا ہے کہ آئی ایم ایف نے اپنے پروگرام پر عمل درآمد بہتر طور پر ہونے کو تسلیم کیا ہے۔

میڈیا سے بات چیت کرتے ہوئے وفاقی وزیرخزانہ محمد اورنگزیب نے بتایا کہ آئی ایم ایف پروگرام پر عمل درآمد بہت بہتر رہا، اور آئی ایم ایف نے اپنے بیان میں اسے تسلیم کیا۔

انہوں نے کہا کہ آئی ایم ایف سے مذاکرات میں کافی پیشرفت ہوئی ہے، نتیجہ خیز نتائج کے لیے آئی ایم ایف سے مشاورت جاری رہے گی۔