لاہور: چوری کے الزام میں ڈرائیور پر تشدد، بال اور مونچھیں مونڈھنے والا ورکشاپ کا مالک گرفتار
لاہور میں چوری کے الزام پر ورکشاپ کے مالک نے اپنی عدالت لگا لی، نوجوان کی مونچھیں ، بھنویں اور بال مونڈھ دیے۔ کاہنہ پولیس نے فوری کارروائی کرتے ہوئے ملزم کو گرفتار کر لیا۔
ڈان نیوز کے مطابق ایک ویڈیو وائرل ہوئی تھی، جس میں دیکھا جاسکتا تھا کہ ایک دکان دار ایک نوجوان پر چوری کا الزام لگانے کے بعد اس کے بال، بھنویں اور مونچھیں مونڈھ رہا ہے، پولیس حکام تک بھی یہ ویڈیو پہنچ گئی۔
اعلیٰ پولیس حکام کے مطابق سوشل میڈیا پر وائرل ہونے والی ویڈیو پر پولیس نے ملزم کے خلاف کارروائی کی، ملزم ملک شبیر نے گجومتہ ٹرانسپورٹ کی ورکشاپ بنا رکھی ہے۔
اس ورکشاپ کے مالک نے مبینہ طور پر ڈیزل چوری کرنے کے الزام میں ڈرائیور محمد دین کی مونچھیں، بھنویں اور سر کے بال مونڈھ ڈالے۔
ورکشاپ کے مالک نے اسی پر اکتفا نہیں کیا، بلکہ ویڈیو بنا کر سوشل میڈ پر بھی ڈال دی تھی، پولیس نے ملزم کے خلاف مقدمہ درج کرتے ہوئے قانونی کارروائی شروع کر دی ہے۔
لائیو ٹی وی