مافیا نے اوگرا نوٹیفکیشن کے بغیر ایل پی جی کی قیمت میں من مانا اضافہ کر دیا، عرفان کھوکھر
ایل پی جی ڈیلرز ایسوسی ایشن کے چیئرمین عرفان کھوکھر نے کہا کہ مافیا نے اوگرا نوٹی فکیشن کے بغیر ایل پی جی کی قیمت میں من مانا اضافہ کر دیا ہے۔
ڈان نیوز کے مطابق عرفان کھوکھر نے اپنے ویڈیو پیغام میں کہا کہ ماہ رمضان کے شروع میں حکومت کی جانب سے ایل پی جی کی سرکاری قیمت 248 روپے فی کلو اور گھریلو سلنڈر کی قیمت 2925 روپے مقرر کی گئی۔
انہوں نے کہا کہ تاہم، سرکاری قیمت 248 روپے فی کلو مقرر ہونے کے باوجود ایل پی جی 350 روپے سے زائد میں فروخت کی جارہی ہے، مافیا کی جانب سے من مانا اضافہ حیران کن ہے۔
ان کا کہنا تھا کہ شہروں میں ایل پی جی کی قیمت 320 روپے فی کلو اور دیہی علاقوں میں 350 روپے فی کلو تک پہنچ گئی ہے، اس کے علاوہ پہاڑی علاقوں میں ایل پی جی 400 روپے فی کلو میں بھی فروخت کی جارہی ہے۔
چیئرمین ایل پی جی ڈیلرز ایسوسی ایشن نے مزید کہا کہ مافیا کی جانب سے بلا جواز قیمت بڑھا کر اربوں روپے کی لوٹ مار کی جارہی ہے۔
ان کا کہنا تھا کہ غریب دوکانداروں کے خلاف کاروائی بند کی جائے اور حکومت سرکاری قیمت پر عمل درآمد یقینی بنائے، انہوں نے مطالبہ کیا کہ حکومت دوکانداروں کی بجائے طاقتور لوگوں کے خلاف ایکشن لے۔
لائیو ٹی وی