سپریم کورٹ: مسیحیوں کیلئے مخصوص ملازمتیں امتیازی قرار دینے کی استدعا مسترد
سپریم کورٹ نے رجسٹرار آفس کے اعتراضات کو برقرار رکھتے ہوئے کرسچن کمیونٹی کے لیے سینیٹری، سوئپرز کی ملازمتیں مخصوص کرنے کو امتیازی قرار دینے کے حوالے سے درخواست خارج کر دی۔
ڈان نیوز کے مطابق مسیحی برادری کے لیے سینیٹری، سوئپرز کی ملازمتیں مخصوص کرنے کو امتیازی قرار دینے کے حوالے سے درخواست پر سماعت کے دوران عدالت نے درخواست گزار خاتون وکیل کے رویے پر اظہار برہمی کیا۔
جسٹس امین الدین خان نے ریمارکس دیے کہ آپ کو عدالت کے سامنے پیش ہونے کا طریقہ کار نہیں آتا؟ اتنے سینئرز پیش ہوئے ہیں، کسی نے آواز اتنی اونچی کی ہے؟
جسٹس نعیم اختر افغان نے کہا کہ مسیحی برادری کے بہت سے لوگ اچھی نوکریوں پر بھی ہیں، مسیحی برادری کے افراد سی ایس پی افسران بھی بنتے ہیں، آپ کہتی ہیں کرسچنز کو صرف سوئپر کے عہدہ ہی دیا جاتا ہے۔
خاتون وکیل نے کہا کہ اخباری اشتہارات میں ایسی نوکریاں مسیحیوں سے منسوب کی جاتی ہیں، اس پر جسٹس نعیم الدین افغان نے کہا کہ اگر ایسا ہے تو مسیحی برادری کے لوگ ان نوکریوں پر اپلائی نہ کریں، اگر آپ نے تقریر کرنی ہے تو ہم آپ کی تقریر سن لیتے ہیں، مسیحی برادری کے بہت سے لوگ اہم این اے، ایم پی ایز اور سینیٹرز ہیں، جہاں میرٹ پر آئیں وہاں بہت سے لوگ ایوان میں بھی بیٹھے ہیں۔
بعد ازاں عدالت نے رجسٹرار آفس کے اعتراضات برقرار رکھتے ہوئے درخواست خارج کر دی۔
لائیو ٹی وی