رواں مالی سال کے پہلے7 ماہ میں بڑی صنعتوں کی پیداوار میں 1.78 فیصد کمی
رواں مالی سال کے پہلے7 ماہ کے دوران بڑی صنعتوں کی پیداوار میں 1.78 فیصد کی کمی ریکارڈ کی گئی ہے۔
ڈان نیوز کے مطابق پاکستان ادارہ شماریات نے بڑی صنعتوں کے پیداوار کا ڈیٹا جاری کر دیا۔
ادارہ شماریات کے مطابق جنوری 2025 میں بڑی صنعتوں کی پیداوار میں سالانہ بنیادوں پر 1.22 فیصد کمی ہوگئی، تاہم دسمبر 2024 کے مقابلے میں جنوری 2025 میں بڑی صنعتوں کی پیداوار 2.09 فیصد بڑھ گئی۔
جاری اعداد و شمار سے مزید پتا چلتا ہے کہ جولائی 2024 تاجنوری 2025 فوڈ شعبے کی پیداوار2.67 فیصدکم ہوئی، جولائی تاجنوری کے دوران فرنیچرکی پیداوار میں 61.61 فیصدکی کمی ہوئی، اسی مدت میں مشینری اورآلات کی پیداوار میں 26.84 فیصدکی کمی ریکارڈ ہوئی۔
اعددا و شمار کے مطابق جولائی تا جنوری فرٹیلائزر،کیمیکلز، آئرن اور اسٹیل مصنوعات کی پیداوار میں تنزلی ہوئی، جبکہ اسی مدت کے دوران لکڑی اورالیکٹریکل مصنوعات کی پیداوار میں منفی رجحان دیکھا گیا۔
ادارہ شماریات کے مطابق جولائی تا جنوری کے دوران تمباکو 20.24 اور مشروبات شعبے کی پیداوار 0.19 فیصد بڑھی، اسی مدت میں آٹوموبیل شعبے کی پیداوار میں 45.74 فیصد اضافہ ہوا۔
مزید بتایا گیا کہ جولائی تا جنوری میں فارماسوٹیکل اورٹیکسٹائل شعبے کی پیداوار میں بھی اضافہ ہوا۔
لائیو ٹی وی