خصوصی سرمایہ کاری سہولت کونسل کی ایگزیکٹو کمیٹی کا اجلاس، جاری منصوبوں کا جائزہ لیا گیا
خصوصی سرمایہ کاری سہولت کونسل (ایس آئی ایف سی) کی ایگزیکٹو کمیٹی کے اجلاس میں مختلف شعبوں میں جاری منصوبوں اور پالیسی اقدامات کا جائزہ لیا گیا۔
ڈان نیوز کے مطابق خصوصی سرمایہ کاری سہولت کونسل (ایس آئی ایف سی) کی ایگزیکٹو کمیٹی کا تیرھواں اجلاس 17 مارچ 2025 کو منعقد ہوا، جس میں مختلف شعبوں میں جاری منصوبوں اور پالیسی اقدامات کا جائزہ لیا گیا۔
اجلاس کی صدارت وزیر برائے منصوبہ بندی، ترقی اور خصوصی اقدامات نے کی جب کہ متعلقہ وفاقی وزرا، نیشنل کوآرڈینیٹر ایس آئی ایف سی، وفاقی و صوبائی سیکریٹریز اور اعلیٰ حکومتی حکام نے شرکت کی۔
اجلاس میں وزارتوں نے مختلف منصوبوں اور پالیسی سطح کے اقدامات پر پیش رفت رپورٹ پیش کی، جو ایس آئی ایف سی کے پلیٹ فارم کے ذریعے آگے بڑھائے جا رہے ہیں، اور متعلقہ امور کو تیز رفتاری سے مکمل کرنے کے لیے جامع منصوبے پیش کیے۔
کمیٹی نے اہم شعبوں، بشمول کنیکٹیویٹی و انفراسٹرکچر، تیل و گیس، اور بندرگاہوں و بحری امور سے متعلق اہم پالیسی معاملات پر تبادلہ خیال کیا اور متفقہ فیصلے کیے۔
کمیٹی نے بلوچستان، پنجاب اور سندھ میں موٹر وے اور شاہراہوں کے جاری منصوبوں کی پیش رفت کا جائزہ لیا اور خصوصی طور پر بندرگاہوں سے منسلک سڑکوں کی تیز رفتار تکمیل کے لیے ہدایات جاری کیں۔
ان منصوبوں میں نجی شعبے کی سرمایہ کاری کو پبلک-پرائیویٹ پارٹنرشپ کے ذریعے بروئے کار لانے پر زور دیا گیا، تاکہ مواصلاتی خلا کو پُر کرکے ملک میں اقتصادی سرگرمیوں کو فروغ دیا جا سکے۔
مزید برآں، کمیٹی نے ہدایت کی کہ مختلف بین الوزارتی امور کو جلد از جلد نمٹانے کے لیے پالیسی اقدامات اور متعلقہ فریقین سے مشاورت کا عمل تیز کیا جائے، تاکہ ان امور کو ایس آئی ایف سی کے پلیٹ فارم کے ذریعے مؤثر انداز میں حل کیا جا سکے۔
لائیو ٹی وی