کراچی: گارڈن سے لاپتا بچوں عالیان اور علی رضا کے کیس کی تفتیش اے وی سی سی کو منتقل
کراچی کے علاقے گارڈن سے لاپتا بچے عالیان اور علی رضا کے کیس کی تفتیش اینٹی وائلنٹ کرائم سیل (اے وی سی سی) کو منتقل کردی گئی ہے۔
ڈان نیوز کے مطابق ایڈیشنل آئی جی کراچی جاوید عالم اوڈھو نے کیس کی اے وی سی سی کو منتقلی کا حکمنامہ جاری کردیا۔
حکمنامے میں کہا گیا ہے کہ ایس ایس پی اے وی سی سی یہ کیس ذاتی نگرانی میں دیکھیں، تفتیش ذمہ دار افسر کے سپرد کی جائے، جو مکمل میرٹ پر تفتیش کرے، لاپتہ بچے کی والدہ نے تفتیش کی تبدیلی کی درخواست دی تھی۔
گزشتہ ماہ لاپتا بچوں کے کیس میں اہم پیش رفت اس وقت سامنے آئی تھی، جب سراغ رساں کتے نے بچوں کی موجودگی کے حوالے سے اہم نشاندہی کی تھی۔
پولیس کے مطابق کتے کو بچوں کےکپڑے سنگھائے گئے تو وہ لیاری کشتی مسجد کے قریب جا کر رک گیا، ایک عینی شاہد نے بچوں کو کشتی مسجد کے قریب دیکھنے کی تصدیق کی تھی۔
پولیس کے مطابق کشتی مسجد کےقریب لیاری ندی ہے، جو دلدلی ہے، عینی شاہد نے بتایا تھا کہ مشینری کی مدد سے ندی کو صاف کیاگیا، ندی میں مزید مقامات کو صاف کرکے تلاشی لی گئی۔
یاد رہے کہ 5 سالہ عالیان عرف علی اور 6 سالہ علی رضا اپنے گھر کے باہر کھیلتے ہوئے گزشتہ ماہ گارڈن ویسٹ سے لاپتا ہوگئے تھے۔
ڈپٹی انسپکٹر جنرل ( ڈی آئی جی) جنوبی سید اسد رضا نے بتایا تھا کہ سی سی ٹی وی فوٹیج سے پتا چلا ہے کہ انہیں موٹر سائیکل پر سوار ایک مرد اور خاتون اپنے ساتھ لے گئے تھے۔
گارڈن پولیس نے عالیان کی والدہ زینب یونس کی مدعیت میں پاکستان پینل کوڈ (پی پی سی) کی دفعہ 364 اے (14 سال سے کم عمر بچے کا اغوا) اور انسانی اسمگلنگ کی روک تھام ایکٹ 2018 کی دفعہ 3 کے تحت ایف آئی آر درج کی ہے۔
بعد ازاں، ایس ایس پی عارف عزیز کی سربراہی میں دونوں لاپتا بچوں کی تلاش کے لیے سرچ آپریشن کیا گیا، اس آپریشن میں گارڈن، نبی بخش، کالاکوٹ، چاکیواڑہ، کلری اور دیگر تھانوں کے ایس ایچ اوز سمیت لیڈی کانسٹیبلز اور انٹیلی جنس اسٹاف نے حصہ لیا تھا۔
پولیس ترجمان کے مطابق سرچ آپریشن کے دوران 19 مشتبہ افراد کو حراست میں لے کر پوچھ گچھ کی گئی تھی تاہم کوئی پیش رفت نہیں ہوسکی تھی، پولیس نے لاپتا بچوں کے بارے میں معلومات فراہم کرنے والے کو 3 لاکھ روپے انعام دینے کا اعلان کیا تھا۔
بعدازاں بچوں کے اغوا کے الزام کی زد میں آنے والے میاں بیوی بے قصور نکلے تھے، واقعے سے منسوب وڈیو میں نظر آنے والا موٹر سائیکل سوار جوڑا اپنے ہی بچوں کو کلینک لے کر جارہا تھا، ویڈیو میں نظر آنے والے لڑکے وہ نہیں تھے جو لاپتا ہیں۔
لائیو ٹی وی