کراچی: لگژری کاریں چوری کرنے کے الزام میں پولیس اہلکار گرفتار
پولیس کے اینٹی وہیکلز لفٹنگ سیل (اے وی ایل سی) نے ایک حاضر سروس پولیس اہلکار کو گرفتار کرنے کا دعویٰ کیا ہے جو کراچی کے پوش علاقوں سے لگژری گاڑیاں چوری کرنے والے گینگ کا مبینہ ’رنگ لیڈر‘ ہے۔
اے وی ایل سی کے سینئر سپرنٹنڈنٹ آف پولیس (ایس ایس پی) بشیر احمد بروہی نے ڈان کو بتایا کہ ایک ٹیلی ویژن اداکارہ کی چوری شدہ ایس یو وی اور فیروز آباد سے چھینی گئی دوسری کار کے علاوہ سرکاری ہتھیار اور منشیات پولیس کے فارن سیکیورٹی سیل میں تعینات ایک کانسٹیبل سے برآمد کی گئی۔
بشیر احمد بروہی کا کہنا تھا کہ ملزم نے پوش علاقوں سے 2 درجن سے زائد گاڑیاں چھیننے کا اعتراف کیا ہے، مزید کہا کہ چوری شدہ گاڑیاں بلوچستان میں فروخت کے لیے بھیجی جا رہی تھیں۔
ایس ایس پی نے بتایا کہ ملزم نے اپنے ساتھیوں کے ساتھ 26 جون 2024 کو کورنگی میں دارالسلام سوسائٹی سے مبینہ طور پر ٹویوٹا فارچیونر ایس یو وی چوری کی، جس کی واضح فوٹیج دستیاب ہے۔
بشیر احمد بروہی نے مزید کہا کہ گینگ نے مبینہ طور پر 7 اکتوبر 2024 کو بخاری کمرشل ڈی ایچ اے سے ایک اور ٹویوٹا فارچیونر چھینی تھی، انہوں نے بتایا کہ ایک مقابلے کے بعد کوئٹہ پولیس نے گینگ کے ایک مشتبہ رکن کو گرفتار کیا اور اس کے قبضے سے گاڑی برآمد کی۔
ایس ایس پی اے وی ایل سی نے بتایا کہ ابھی حال ہی میں اس گروہ نے مبینہ طور پر 6 فروری کو خیابانِ محفوظ سے ایک اداکارہ کی ٹویوٹا فارچیونر چوری کی، جسے برآمد کر لیا گیا ہے۔
ان کا کہنا تھا کہ فیروز آباد میں گزشتہ سال گن پوائنٹ پر چھینی گئی ایک سوزوکی آلٹو بھی برآمد کر لی گئی۔
ایس ایس پی بشیر احمد بروہی نے بتایا کہ ان تین گاڑیوں کے علاوہ ملزم نے 2 درجن سے زائد لگژری کاروں کی چوری کا انکشاف کیا۔
ان کا کہنا تھا کہ گینگ کے باقی ارکان کی گرفتاری کے لیے ٹھوس کوششیں جاری ہیں۔
لائیو ٹی وی