سیکیورٹی فورسز نے خیبرپختونخوا کے ضلع بنوں کینٹ میں فتنہ الخوارج کی جانب سے دہشت گرد حملہ ناکام بناتے ہوئے 6 خارجی دہشت گردوں کو ہلاک کردیا۔

ڈان نیوز کے مطابق سیکیورٹی ذرائع نے بتایا کہ آج افطار کے بعد دہشت گردوں نے بنوں کینٹ میں گھسنے کی کوشش کی، اس دوران دہشت گردوں نے 2 بارود سے بھری گاڑیاں بنوں کینٹ کی دیوار سے ٹکرائیں۔

سیکیورٹی ذرائع کا مزید کہنا تھا کہ فورسز نے دہشت گردوں کی بنوں کینٹ میں گھسنے کی کوشش ناکام بنائی اور سیکیورٹی اہلکاروں نے 6 خارجی دہشت گردوں کو مختلف انٹری پوائنٹس پر ہلاک کیا۔

سیکیورٹی ذرائع کے مطابق سیکیورٹی اہلکاروں نے دیگر دہشت گردوں کو بھی محصور کرلیا ہے جب کہ بارود سے بھری گاڑیوں سے قریبی مسجد کو نقصان پہنچا۔

ذرائع کے مطابق قریبی مسجد کی چھت گرنے سے متعدد شہادتوں کی اطلاعات ہیں۔

غیر ملکی خبررساں ادارے ’اے ایف پی‘ کے مطابق سینئر ضلعی پولیس افسر نے نام ظاہر نہ کرنے کی شرط پر اے ایف پی کو بتایا کہ خود کش بمباروں نے دھماکہ خیز مواد سے بھری دو گاڑیاں بنوں چھاؤنی کے داخلی دروازے سے ٹکرا دیں جس کے نتیجے میں بڑے پیمانے پر دھماکے ہوئے، جس کے بعد متعدد دہشت گردوں نے کمپاؤنڈ میں گھسنے کی کوشش کی۔

ڈسٹرکٹ ہیڈ کوارٹر ہسپتال کے ترجمان نعمان خطاب کے مطابق زخمیوں کو علاج کے لیے ہسپتال لایا گیا ہے۔

پاک فوج کے شعبہ تعلقات عامہ (آئی ایس پی آر) کی جانب سے اب تک اس واقعے پر کوئی بیان جاری نہیں کیا گیا ہے۔

تاہم وزیر اعلیٰ خیبرپختونخوا علی امین گنڈاپور کے دفتر سے جاری ہونے والے ایک بیان میں ضلع بنوں میں ہونے والے دھماکے کی مذمت کی گئی ہے۔

بیان میں کہا گیا ہے کہ وزیر اعلیٰ نے اس واقعہ پر افسوس کا اظہار کرتے ہوئے سینئر پولیس عہدیداروں سے رپورٹ طلب کی ہے جب کہ ضلعی انتظامیہ کو زخمیوں کو بروقت طبی امداد کو یقینی بنانے کی ہدایت کی گئی ہے۔

وزیراعلیٰ آفس سے جاری بیان میں مزید کہا گیا کہ رمضان کے مقدس مہینے میں اس طرح کے واقعات انتہائی قابل مذمت اور افسوسناک ہیں۔

صدر پاکستان کی حملے کی مذمت

صدر آصف زرداری نے بنوں میں دہشت گردوں کے حملے کی مذمت کرتے ہوئے کہا کہ رمضان میں افطار کے دوران ایسا حملہ گھناؤنا عمل ہے۔

صدر مملکت نے دہشت گردوں کو جہنم واصل کرنے پر سیکیورٹی فورسز کی تعریف کرتے ہوئے کہا کہ فتنہ الخوارج کی سرکوبی کیلئے کارروائیاں جاری رکھنے کیلئے پرعزم ہیں۔

انہوں نے شہدا کے لیے بلندی درجات اور اہل خانہ کیلئے صبر جمیل کی دعا کرتے ہوئے کہا کہ پوری قوم ایسی مذموم کارروائیوں کو مسترد کرتی ہے۔

وزیر داخلہ کا سیکیورٹی فورسز کو خراج تحسین

وفاقی وزیر داخلہ محسن نقوی نے بنوں حملے میں قیمتی انسانی جانوں کے ضیاع پر دکھ کا اظہار کیا اور زخمیوں کی جلد صحتیابی کے لیے دعا کی۔

وزیر داخلہ نے سیکیورٹی فورسز کو خراج تحسین پیش کرتے ہوئے کہا کہ فورسز نے بروقت کارروائی کرکے 6 دہشت گردوں کو ہلاک کیا، خوارج کے مذموم عزائم کو خاک میں ملانے پر سیکورٹی فورسز کو سلام ہے جب کہ قوم کو سیکیورٹی فورسز کی پیشہ وارانہ صلاحیتوں پر ناز ہے۔