اسحٰق ڈار او آئی سی وزرائے خارجہ اجلاس میں شرکت کیلئے سعودی عرب جائیں گے
نائب وزیراعظم اور وزیر خارجہ سینیٹر اسحٰق ڈار اسلامی تعاون تنظیم کے وزرائے خارجہ کے غیر معمولی اجلاس میں شرکت کے لیے سعودی عرب جائیں گے۔
ترجمان دفتر خارجہ کی جانب سے جاری بیان میں کہا گیا کہ او آئی سی کا غیر معمولی اجلاس 7 مارچ کو جدہ میں ہوگا جس میں فلسطین کی موجودہ صورتحال اور خاص طور پر اسرائیلی جارحیت پر غور کیا جائے گا۔
ترجمان کا کہنا تھا کہ اعلیٰ سطح کے اجلاس میں او آئی سی کے رکن ممالک کے وزرائے خارجہ اور سینئر حکام شرکت کریں گے، اجلاس کے دوران اسرائیلی جارحیت، فلسطینیوں کے حقوق کی خلاف ورزیوں اور ان کی غزہ سے نقل مکانی کے مطالبے سے متعلق مشترکہ اقدامات پر غور کیا جائے گا۔
ترجمان دفتر خارجہ نے کہا کہ فلسطین کاز کے مضبوط حامی کی حیثیت سے پاکستان نے مختلف بین الاقوامی پلیٹ فارمز پر اس مسئلے کو مسلسل اجاگر کیا ہے جب کہ او آئی سی وزرائے خارجہ اجلاس میں بھی اسحٰق ڈار فلسطین کاز کے لیے پاکستان کی مستقل حمایت کا اعادہ کریں گے۔
دفتر خارجہ سے جاری بیان کے مطابق وزیر خارجہ مقبوضہ بیت المقدس سمیت تمام مقبوضہ علاقوں سے اسرائیل کے مکمل انخلا کا مطالبہ کریں گے اور فلسطینیوں کی مزید بے دخلی سے متعلق ناقابل قبول تجویز کو مسترد کریں گے۔
ترجمان کے مطابق اجلاس کے دوران نائب وزیراعظم فلسطینی عوام کے ناقابل تنسیخ حقوق کی بحالی کا مطالبہ کریں گے جس میں جون 1967 سے پہلے کی سرحدوں پر مبنی ایک قابل عمل اور خود مختار فلسطینی ریاست کے قیام کا مطالبہ بھی شامل ہے جس کا دارالحکومت القدس شریف ہوگا۔
علاوہ ازیں، وزیر خارجہ اسحٰق ڈار دورہ سعودی عرب کے موقع پر او آئی سی کے اہم رکن ممالک کے ہم منصبوں سے دو طرفہ ملاقاتیں بھی کریں گے۔
لائیو ٹی وی