عوام کے جان و مال کے تحفظ کیلئےکوئی کسر نہیں چھوڑیں گے، وزیراعلیٰ بلوچستان
وزیراعلیٰ بلوچستان سرفراز بگٹی نے دوٹوک پیغام دیا ہے کہ عوام کے جان و مال کا تحفظ یقینی بنانے کے لیے کوئی کسر نہیں چھوڑی جائے گی اور اس سلسلے میں ہر ممکن اقدامات کیے جائیں گے۔
ڈان نیوز کے مطابق صوبائی اپیکس کمیٹی کا اجلاس وزیر اعلیٰ بلوچستان سرفراز بگٹی کی صدارت میں کوئٹہ میں منعقد ہوا، اجلاس میں کمانڈر بلوچستان کور لیفٹیننٹ جنرل راحت نسیم احمد، چیف سیکریٹری شکیل قادر خان، آئی جی پولیس سمیت دیگر اعلیٰ حکام نے شرکت کی۔
اجلاس میں صوبے میں امن و امان کی صورتحال اور انسداد دہشت گردی کے اقدامات کا جائزہ لیا گیا، اجلاس میں سیکیورٹی فورسز کی کارکردگی، قومی اور صوبائی سطح پر ہونے والے گذشتہ اپیکس کمیٹی کے فیصلوں پر عملدرآمد کا بھی جائزہ لیا گیا۔
صوبائی اپیکس کمیٹی کے اجلاس میں شرکا نے بلوچستان میں پائیدار امن کے قیام کے لیے سیکیورٹی فورسز اور سول انتظامیہ کے درمیان قریبی رابطہ ضروری قرار دیا۔
اجلاس کے دوران دہشت گردی کے خاتمے کیلئے سخت اقدامات اور انٹیلیجنس شیئرنگ مزید مؤثر بنانے پر بھی زور دیا گیا۔
اجلاس کے دوران بارڈر مینجمنٹ، اسمگلنگ کی روک تھام اور نیشنل ایکشن پلان کے تحت کیے جانے والے اقدامات بھی زیر غور آئے۔
اس موقع پر، وزیر اعلیٰ سرفراز بگٹی نے اپنی گفتگو میں کہا کہ صوبے میں قیام امن کے لیے تمام ادارے ایک پیج پر ہیں اور عوام کے جان و مال کے تحفظ کو یقینی بنانے کے لیے کوئی کسر نہیں چھوڑی جائے گی۔
انہوں نے ہدایت کی کہ اجلاس میں کئے گئے فیصلوں پر فوری عملدرآمد کیا جائے، عوام کے جان و مال کے تحفظ اور ترقیاتی منصوبوں کے تسلسل کو یقینی بنانے کے لیے حکومت ہر ممکن اقدامات کرے گی۔
لائیو ٹی وی